Шавкат Мирзиёев Саудия компанияларини янги лойиҳаларни ишлаб чиқиш ва амалга оширишда ҳамкорлик қилишга чақирди

Шавкат Мирзиёев 18 август куни Жидда шаҳрида Саудия Арабистони подшоҳлигининг етакчи компаниялари ва молиявий тузилмалари раҳбарлари билан учрашув ўтказди. Бу ҳақда Президент матбуот хизмати хабар қилди.

Тадбирда инвестициялар вазири Холид ал-Фалиҳ ҳамда подшоҳликнинг «ACWA Power», «SABIC», «Saudi National Bank», «Аl Rajhi Capital», «Ма’aden», «Petromin», «Jamjoom Pharma», «SEDCO», «Salic», «Albawani», «Ajlan & Bros», «Desert Technologies» каби йигирмага яқин энг йирик компания ва корпорациялари раҳбарлари иштирок этган.

Президент кеча валиаҳд шаҳзода билан музокараларда икки томонлама савдо айланмасини бир неча карра кўпайтириш, тадбиркорларнинг ташаббусларини ҳар томонлама қўллаб-қувватлаш ва инвестиция лойиҳаларни молиялаштириш бўйича келишувга эришилганини таъкидлаган.

Мамлакатда муваффақиятли иш юритаётган Саудия компанияларининг тажрибаси кўрсатиб ўтилган. Масалан, «ACWA Power» компанияси билан ҳамкорликда 2 миллиард 600 миллион долларлик йирик энергетика лойиҳалари бошланган.

Таъкидланишича, Ўзбекистон—Саудия ишбилармонлар кенгаши якунида умумий қиймати 14 миллиард долладан зиёд лойиҳаларни амалга ошириш тўғрисида битимлар имзоланган.

Давлат раҳбари Саудия компанияларини янги лойиҳаларни ишлаб чиқиш ва амалга оширишда ҳамкорлик қилишга чақирган.

Учрашувда Шавкат Мирзиёев саудиялик ишбилармонларни Ўзбекистондаги йирик банклар, саноат ва инфратузилма объектларини хусусийлаштириш жараёнларида иштирок этишга таклиф этган. Қўшма лойиҳаларни амалга ошириш учун истиқболли соҳалар сифатида «яшил» энергетика ва «яшил» иқтисодиёт кўрсатиб ўтилган.

Ўзбекистон шамол электр станцияларини қуриш, «яшил» водород ишлаб чиқариш, муқобил энергетикани ривожлантириш, саноатда рақамлаштиришни чуқурлаштириш ва қўшма илмий тадқиқотлар билан шуғулланиш борасида ҳамкорликка тайёр экани таъкидланган.

Президент Ўзбекистон рақамли иқтисодиёт, био ва нанотехнологиялар, дастурий таъминот, инновациялар ва сунъий интеллект соҳаларида шерикликни кенгайтиришдан манфаатдорлигини қайд этган.

Озиқ-овқат маҳсулотларини ишлаб чиқариш, соғлиқни сақлаш ва туризм лойиҳаларини амалга оширишга алоҳида эътибор қаратиш таклиф қилинган.

Шунингдек, Ўзбекистонда Саудия тараққиёт фонди иштирокида сув ва электр таъминоти борасидаги инфратузилмавий лойиҳаларни такомиллаштириш ишларини давом эттириш режалаштирилган.

Саудия Арабистони компания, холдинг ва корпорациялари раҳбарлари Ўзбекистонда фаол бизнес учун яратилган шароитларни юқори баҳолаган. Ўз чиқишларида улар қўшма лойиҳаларни амалга ошириш режаларини баён қилиб, турли хил йўналишларда ўзаро алоқалар ва шерикликни ривожлантиришга доир нуқтаи назари билан бўлишган.

Шавкат Мирзиёев саудиялик ҳамкорларнинг таклиф ва фикр-мулоҳазаларини тинглаб, барча лойиҳаларнинг амалга оширилиши устидан қатъий назорат ўрнатилишини қайд этган.

Мутасаддиларга таъсирчан механизмлар ва аниқ ижро муддатлари кўрсатилган комплекс «Йўл харитаси»ни қабул қилиш топширилган. Шу орқали ташриф доирасида эришилган барча келишувлар ижроси учун тегишли вазирлик ва идоралар раҳбарлари шахсан жавобгар бўлади.