O‘zbekistonda nogironlik pensiyasini oluvchi ishlayotgan fuqarolarga bir qator imtiyozlar berilishi mumkin

Oliy Majlis Qonunchilik palatasining Mehnat va ijtimoiy masalalar qo‘mitasi tomonidan kengaytirilgan yig‘ilish o‘tkazildi. Unda quyi palata deputatlari, tegishli vazirlik va idoralar vakillari, ishchi guruh a’zolari, olimlar, ekspertlar ishtirok etdi, deb xabar bermoqda quyi palata axborot xizmati.

Qayd etilishicha, yig‘ilishda deputatlar tomonidan “Fuqarolarning davlat pensiya ta’minoti to‘g‘risida”gi qonunga pensiya tayinlash tartibini takomillashtirishga qaratilgan o‘zgartish va qo‘shimchalar kiritish haqida”gi qonun loyihasi dastlabki tarzda ko‘rib chiqilgan.

Mazkur qonun loyihasi prezidentning 2022-yil 29-apreldagi “Ijtimoiy himoyaga va yordamga muhtoj aholi qatlamlarini moddiy qo‘llab-quvvatlashga doir qo‘shimcha chora-tadbirlar to‘g‘risida”gi qarorining 6-bandi ijrosini ta’minlash maqsadida ishlab chiqilgan.

Hujjatda “Fuqarolarning davlat pensiya ta’minoti to‘g‘risida”gi qonuniga tegishli o‘zgartish va qo‘shimchalar kiritish yo‘li bilan 2023-yil 10yanvardan boshlab I va II guruh nogironligi bo‘lgan shaxslarning pensiya tayinlangandan keyingi kamida 1 yillik mehnat davri ularning oylik daromadidan kelib chiqib har 2 yilda qayta hisoblanishi va pensiya miqdoriga qo‘shib borilishi nazarda tutilmoqda.

Yig‘ilishda qonun loyihasiga kiritilayotgan o‘zgartish va qo‘shimchalar imkoniyati cheklangan minglab fuqarolarning ijtimoiy himoyasini kuchaytirish, og‘irini yengil qilish, oilalar farovonligini oshirishga xizmat qilishi ta’kidlangan.

Muhokamalar davomida qonun loyihasidagi ayrim normalar yuzasidan asosli takliflar, fikr-mulohazalar bildirilgan. Deputatlar ishchi guruh a’zolariga bir qator savollar bilan yuzlangan va ularga batafsil javoblar olgan.

Yakunda qo‘mita a’zolari qonun loyihasini Qonunchilik palatasining navbatdagi kengash yig‘ilishi va yalpi majlisiga birinchi o‘qishda ko‘rib chiqish mumkinligi to‘g‘risidagi qarorni qabul qilgan.