Guliston davlat universitetiga o‘qishga kiritib qo‘yish evaziga 10 ming dollar olgan shaxs ushlandi

Sirdaryo viloyatining Sardoba tumani va Buxoro viloyatining Olot tumanida o‘qishga kiritib qo‘yish bilan bog‘liq firibgarlik holatlari fosh etildi.

Bosh prokuratura huzuridagi departamentning Sardoba tuman bo‘limi tomonidan o‘tkazilgan tezkor tadbirda fuqaro F.SH. boshqa bir fuqaro H.ni yuqori lavozimda ishlovchi tanishlari yordamida Guliston davlat universitetiga o‘qishga kiritib qo‘yish evaziga 10 ming dollarni olgan vaqtida ashyoviy dalillar bilan ushlangan.

Shu kabi, Olot tuman bo‘limi tomonidan o‘tkazilgan tezkor tadbirda, fuqarolar N.H. va S.B. fuqaro Z.ning qizini Buxoro tibbiyot texnikumiga o‘qishga kiritib qo‘yishni 800 dollarga kelishib, shundan 400 dollarni olgan vaqtida ushlangan.

Shuningdek, tadbir davomida ushbu fuqarolar Z.ning to‘ng‘ich qizini ham texnikumga o‘qishga kiritib qo‘yish evaziga 500 dollarni olgani aniqlanib, 200 dollarini qaytargani protsessual tartibda rasmiylashtirilgan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.

Mavzuga doir:

• Samarqandda fuqarodan oliygohga kiritib qo‘yish uchun 4000 dollar pora olgan shaxs ushlandi
• Toshkentdagi Xalqaro Vestminster universitetiga 10 200 dollar evaziga o‘qishga kiritib qo‘ymoqchi bo‘lgan shaxs ushlandi