DXXning Sirdaryo viloyati bo‘yicha boshqarmasi tomonidan hududiy bojxona boshqarmasi xodimlari bilan hamkorlikda kuchli ta’sir qiluvchi dori vositalarining Qirg‘iziston–—Farg‘ona vodiysi —Toshkent —Sirdaryo yo‘nalishida noqonuniy aylanmasiga qarshi kurashish doirasida bir nechta faol tadbirlar amalga oshirildi, deb xabar bermoqda O‘zA.
Jumladan, Farg‘ona tumanida yashovchi, 1975-yilda tug‘ilgan fuqaro boshqaruvidagi Damas Toshkentning Yashnobod tumani hududida to‘xtatilib, ko‘zdan kechirilganda, Qirg‘izistondan olib kirilgan va keyinchalik Toshkent orqali Sirdaryo viloyati hududiga olib borish rejalashtirilgan 4 200 dona “Regapen” va 1000 dona “Tropikamid” kuchli ta’sir qiluvchi dori vositalari borligi aniqlanib, protsessual tartibda rasmiylashtirib olingan.
Shuningdek, Farg‘ona—Toshkent yo‘nalishida harakatlanib kelayotgan Toshkent shahrida yashovchi, 1986-yilda tug‘ilgan shaxs boshqaruvidagi Nexia-2 poytaxtdagi “Sharq” YPX maskanida to‘xtatilib, ko‘zdan kechirilgan. Tekshiruv natijasida avtomashina yukxonasidagi metan gaz baloni ichiga xufiyona tarzda yashirilgan 999 dona “Tropikamid” va 3356 dona “Regapen” nomli kuchli ta’sir etuvchi dori vositalari borligi aniqlanib, protsessual tartibda rasmiylashtirib olingan.
Bundan tashqari, Farg‘ona viloyatida yashovchi, 1987-yilda tug‘ilgan shaxs Toshkent viloyati O‘rtasaroy tumani hududida qo‘lga olinib, uning yuk sumkasi ko‘zdan kechirilganda, unda 900 dona “Tropikamid” va 1680 dona “Regapen” kuchli ta’sir qiluvchi dori vositalari borligi aniqlangan.
Toshkent shahrida o‘tkazilgan tezkor tadbirda esa “Bektemir” yo‘l-patrul xizmati maskani hududida Lacetti tekshirilganda, yo‘lovchi sifatida ketayotgan shaxsga tegishli polietilin paketda 504 dona “Regapen”, 91 dona “Tropikamid” dori vositalari borligi aniqlangan.
Hozirda barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Mavzuga doir:
Izoh (0)