AQSHdagi tennis musobaqasida Ukraina bayrog‘ini ko‘tarib olgan muxlis stadiondan chiqarib yuborildi. Muxlis o‘zbekistonlik bo‘lgani aytilmoqda (video)

AQSHning Sinsinnati shahrida o‘tkazilayotgan tennis musobaqasining saralash o‘yinlarida bahsli holat yuz berdi.

WTA turkumiga kiruvchi musobaqa doirasidagi o‘yinda rossiyalik tennischilar Anastasiya Potapova va Anna Kalinskaya o‘zaro bahsga kirishgan. Mazkur o‘yinning tanaffus vaqtida tribunada Ukraina bayrog‘ini ko‘tarib olgan ayol musobaqa tashkilotchilari tomonidan arenadan chiqarib yuborilgan.

Insider ma’lumotlariga ko‘ra, kelib chiqishi o‘zbekistonlik bo‘lgan, hozirda AQShda yashovchi fuqaroning tribunada Ukraina bayrog‘ini ko‘tarib olgani rossiyalik tennischilarga yoqmagan.

Tanaffus vaqtida uchrashuv bosh hakami tomoshabinning bu harakati tennischilarni provokatsiya qilishga sabab bo‘lishini aytib, ayoldan tribunani tark etishni so‘ragan.

WTA va musobaqa tashkilotchilari holatga izoh bergan. Qayd etilishicha, bayroqning o‘lchami tribunaga olib kirishga ruxsat etilgan 18x18 dyumdan (46x46 santimetr) katta bo‘lgan. Shu bois tashkilotchilar tomoshabindan bayroqni olib qo‘yishni so‘ragan.

Mazkur holat ijtimoiy tarmoqlarda keng muhokamalarga sabab bo‘lmoqda. Ayniqsa, bu voqeaning AQSHda yuz bergani ko‘pchilikda savol uyg‘otyapti.