АҚШ ва бир нечта Европа мамлакатлари Украинадаги вазият туфайли БМТ Хавфсизлик кенгаши мажлисини ўтказиш учун сўров юборди, деб ёзади «РБК».
«РИА Новости» маълумотларига кўра, сўровга АҚШдан ташқари, Франция, Буюк Британия (улар Хавфсизлик кенгашининг доимий аъзолари), шунингдек, Ирландия, Норвегия, Албания (доимий бўлмаган аъзолар) қўшилган. Йиғилиш 24 августда ўтказилиши сўралган.
«ТАСС» манбаси аниқлик киритишича, бошқа масалалар билан бир қаторда БМТ бош котиби Антониу Гутерришнинг Украинага ташрифи якунлари муҳокама қилинади. У 17 август, чоршанба куни Львовга борганди. Гутерриш Украина президенти Владимир Зеленский ва Туркия президенти Ражаб Тоййиб Эрдўғон билан уч томонлама музокаралар ўтказишни режалаштирган. Бундан ташқари, бош котиб дон бўйича келишувда иштирок этаётган учта портдан бирига бормоқчи.
Россия Украинада операция бошлаганидан кейин БМТ Хавфсизлик кенгаши Ғарбнинг талаби билан ҳам, Россиянинг талаби билан ҳам бир неча марта йиғилишлар ўтказган. Июнь охирида мажлислардан бирида Зеленский Россия Хавфсизлик кенгаши аъзоси бўлиб қолишга ҳақи йўқлигини айтиб, БМТ Бош ассамблеясида Россия делегациясини ваколатларидан маҳрум қилишга чақирган эди. Аммо ташкилот низомида Хавфсизлик кенгашидан доимий аъзони чиқариб ташлаш кўзда тутилмаган.
Шундан кейин Бош ассамблея 67-сессияси раиси вакили Полина Кубиак мамлакатни ассамблеядан чиқариш ҳақидаги қарор фақат БМТ Хавфсизлик кенгаши томонидан қабул қилинишини эслатди.
10 август куни Россия Запорожье АЭСнинг ўққа тутилиши туфайли Хавфсизлик кенгаши мажлисини чақиришни талаб қилганди. 11 август куни бўлиб ўтган сессияда Россиянинг БМТ ҳузуридаги доимий вакили Василий Небензя ҳужумларда россиялик ҳарбийларнинг айбланиши бемаънилик эканини айтди.
Халқаро атом энергияси агентлиги (МАGATE) бош директори Рафаэл Мариано Гросси мажлисда қатнашиб, АЭСга нисбатан олиб борилаётган ҳарбий ҳаракатлар исталган вақтда ядровий ҳалокатга олиб келиши ҳақида огоҳлантирди. У ушбу вазиятни ўта хавотирли деб атади.
Изоҳ (0)