Xorazmda litsenziyasi bo‘lmagan 2 ta nodavlat ta’lim muassasasi bakalavrda o‘qimoqchi bo‘lganlarning pullarini qo‘lga kiritgani aniqlandi

Xorazm viloyatida fuqarolarning mablag‘larini firibgarlik yo‘li bilan qo‘lga kiritgan nodavlat ta’lim muassasalari aniqlandi, deb xabar bermoqda Bosh prokuratura huzuridagi departament.

Departamentning Xorazm viloyat boshqarmasi tomonidan fuqarolarning huquq va manfaatlarini himoya qilish yuzasidan o‘tkazilgan tergovga qadar tekshiruvda aniqlanishicha, “Y.Sh.” MCHJ hamda “U.I.U.” nodavlat ta’lim muassasasi rahbarlari va xodimlari ushbu ta’lim maskani tegishli litsenziyaga ega bo‘lmasa-da, 45 nafar fuqaroni bakalavr yo‘nalishi bo‘yicha o‘qitishga hujjatlari borligiga ishontirgan.

Ular 2021/2022-o‘quv yili uchun har bir fuqarodan 2 million so‘mdan 16 million so‘mgacha jami 353,5 million so‘mini shartnoma to‘lovlari sifatida qabul qilishib, o‘zlarining shaxsiy ehtiyojlari uchun ishlatib yuborgan.

Mazkur holat yuzasidan Jinoyat kodeksining 168-moddasi (firibgarlik) hamda 190-moddasi (faoliyat bilan litseziyasiz yoki ruxsat etish xususiyatiga ega hujjatsiz yoxud xabarnoma yubormasdan shug‘ullanish) bilan jinoyat ishi qo‘zg‘atilib, tergov harakatlari o‘tkazilmoqda.