Jinoyat ishlari bo‘yicha Yashnobod tuman sudida VKA rejimida, tuman sudining sudyasi Anvar Ikromovning raisligida 1983-yilda tug‘ilgan, ilgari Uchtepa tuman prokuraturasida tergovchi lavozimida ishlagan shaxsga nisbatan jinoyat ishi ko‘rib chiqildi. Bu haqda Toshkent shahar sudi matbuot xizmati “Daryo”ga xabar qildi.
Sudlanuvchi 2019-yilning avgustidan Uchtepa tuman prokuraturasi tergovchisi lavozimida ishlab kelgan.
Egallab turgan lavozimiga ko‘ra, mansabdor shaxs bo‘la turib, bevosita o‘ziga yuklatilgan xizmat vazifalaridan kelib chiqib, o‘z faoliyatini qonun hujjatlari doirasida amalga oshirib, qonuniy, asosli va adolatli qarorlar qabul qilish kiradi.
Biroq ish yurituvidagi Toshkent shahar prokurorining 2022-yil 8-aprel kunidagi roziligi bilan Iqtisodiy jinoyatlarga qarshi departamentning Uchtepa tumani bo‘limi tomonidan MCHJ mansabdor shaxslariga nisbatan Jinoyat kodeksi 184-moddasining 3-qismi va 189-moddasining 1-qismi bilan qo‘zg‘atilgan jinoyat ishi bo‘yicha 2022-yilning 9-aprel kunidan dastlabki tergov harakatlarini olib borgan.
Tergovchi noqonuniy boylik orttirish maqsadida MCHJning yagona ta’sischisi va rahbari hamda jamiyatning huquqshunosini bir necha marotaba Uchtepa tumani prokuraturasiga chaqirtirgan.
Ularga jinoyat ishi bo‘yicha jamiyatning moliyaviy-xo‘jalik faoliyati bo‘yicha aniqlangan 1 milliard 186 million 612 ming 773 so‘mlik qo‘shimcha qiymati solig‘i va 859 million 868 ming 334 so‘mlik foyda solig‘ini jami 2 milliard 46 million 481 ming 107 so‘m miqdordagi zararlarni to‘lanmagan taqdirda, ish bo‘yicha jamiyatning rahbarini ayblanuvchi tariqasida ishtirok etishga jalb qilishni aytgan.
Bundan tashqari, unga nisbatan qamoqqa olish tarzidagi ehtiyot chorasini qo‘llashni, sodir etilgan jinoyati uncha og‘ir bo‘lmagan jinoyatlar turkumiga kirsa-da, unda besh yilgacha ozodlikdan mahrum etish jazosi belgilanganini, jamiyatning rahbariga nisbatan qamoqqa olish tarzidagi ehtiyot chorasi qo‘llamaslik uchun unga pora tariqasida 50 000 AQSH dollarini berishini aytgan.
Agar bunga rozi bo‘lmasa JPKning 221-moddasi tartibida ushlashini va qamoqqa olish tarzidagi ehtiyot chorasini qo‘llashlik uchun tuman sudiga iltimosnoma taqdim qilishini aytib, tamagirlik yo‘li bilan jamiyatning huquqshunosi orqali 50 000 AQSH dollari miqdoridagi pullarni berishni bir necha marotaba talab qilgan.
Xususan, MCHJning yagona ta’sischisi va rahbarining arizasiga asosan, 2022-yil 29-aprel kuni, soat 12:30 larda, DXX Toshkent shahri bo‘yicha boshqarmasi xodimlari tomonidan o‘tkazilgan tezkor tadbirda, tergovchi Uchtepa tumani, Farhod ko‘chasidagi savdo majmuasi oldiga Matiz rusumli avtomashinada yo‘lovchi sifatida kelib, u yerda uni kutib turgan jamiyatning huquqshunosini ushbu avtomashinaning orqa o‘rindig‘iga o‘tqizgan.
So‘ng avtomashina kinoteatr oldidagi chorrahaga yetgach, avtomashina saloni ichida jamiyatning huquqshunosidan polietilen paketga solingan, oldindan kimyoviy ishlov berilgan 50 000 AQSH dollarini olgandan keyin jamiyatning huquqshunosini tushirib, ushbu mashinada harakatlanishni davom ettirib, 3-bekatga yaqinlashganida tezkor xodimlar tomonidan tadbir davomida ushlangan.
Sud-daktiloskopik ekspertizasining xulosasiga ko‘ra, oq-havo rangli polietilen paketda sudlanuvchining chap qo‘l katta barmog‘ining izi borligi aniqlangan.
Sud majlisida sudlanuvchi tariqasida so‘roq qilingan sudlanuvchi unga e’lon qilingan aybga qisman iqrorlik bildirdi.
Sudning hukmiga ko‘ra, sudlanuvchi Jinoyat kodeksining 210-moddasi (pora olish) 3-qismining “a” bandida nazarda tutilgan jinoyatni sodir etganlikda aybdor deb topildi va Jinoyat kodeksining 45-moddasiga asosan 3 yil muddatga mansabdorlik lavozimlarida va prokuratura idoralarida ishlash huquqidan mahrum qilingan holda, 13 yil muddatga ozodlikdan mahrum qilish jazosi tayinlandi.
Izoh (0)