Toshkent metrosining “O‘zbekiston” yo‘nalishida 16-avgust kuni soat 17:30 lar oralig‘ida metro harakati to‘xtab qolgani xabar qilingandi. “Toshkent metropoliteni” davlat-unitar korxonasi holatga munosabat bildirdi.
Qayd etilishicha, soat 17:33 lar atrofida “Chorsu” bekatidan “Tinchlik” bekatiga harakatlanayotgan 33-sonli harakat tarkibining vagonlarini yorug‘lik chiroqlari bilan ta’minlash tizimida qisqa muddatli nosozlik yuzaga kelgan.
Mashinist esa belgilangan yo‘riqnomaga asosan harakat tezligini pasaytirib, “Tinchlik” bekatiga kirib kelgan va yo‘lovchilarni shu bekatda qoldirgan. 2 daqiqadan so‘ng ortdan kelgan 31-sonli harakat tarkibi bekatdagi barcha yo‘lovchilarni “Beruniy” bekatigacha olib borgan.
Hozirda barcha poyezdlar belgilangan jadval asosida harakatlanmoqda.
“Keltirilgan noqulaylik uchun barcha yo‘lovchilardan uzr so‘raymiz”, — deyiladi xabarda.
Izoh (0)