AQSH Davlat departamenti rasmiy vakili Ned Prays ma’lum qilishicha, AQSH 3,5 milliard dollar miqdoridagi muzlatilgan mablag‘larni “Tolibon” tomonidan nazorat qilinuvchi Afg‘oniston Markaziy bankiga o‘tkazishni rejalashtirmayapti, ammo mamlakat xalqiga to‘g‘ridan to‘g‘ri foyda keltirish yo‘llarini qidiradi. Bu haqda Time xabar berdi.
“Biz saqlanib qolgan ushbu 3,5 milliard dollar Afg‘oniston xalqiga samarali borib yetishi, terrorchilik guruhlari yoki boshqalar qo‘liga tushib qolmasligini ta’minlash uchun qo‘llash mumkin bo‘lgan mexanizmlarni qidirmoqdamiz”, — dedi Prays brifingda.
Uning aytishicha, aktivlar blokdan chiqarilganidan keyin ular mas’uliyat bilan ishlatilishiga AQSH hozircha ishonchi komil emas.
Praysning gaplari shundan darak beradiki, “Al-Qoida” yetakchisi Ayman az-Zavohiriy iyul oxirida uchuvchisiz uchar qurilma yordamida o‘ldirilishidan avval bir qancha vaqt davomida Kobul markazida yashagani ma’lum bo‘lganidan keyin Bayden ma’muriyati pullarni bevosita hukumatga topshirish bo‘yicha har qanday imkoniyatlardan voz kechgan.
Aktivlar bir yil avval Amerika qo‘shinlari Afg‘onistonni tark etib, hokimiyatni “Tolibon” egallab olganidan keyin muzlatilgan edi. AQSH rasmiylari pul masalasini kelishib olish bo‘yicha sa’y-harakatlar doirasida toliblar yetakchilari bilan O‘zbekistonda uchrashgan edi.
Praysning so‘zlariga ko‘ra, Zavohiriyning Afg‘onistonda yashagani toliblar pullarning terrorchilik guruhlar tomonidan qo‘llanilishiga to‘sqinlik qilmasligi borasidagi xavotirlarni kuchaytiradi, xolos.
Ushbu summa AQSH moliya muassasalarida saqlanayotgan 7 milliard dollar miqdoridagi muzlatilgan afg‘on aktivlarining yarmini tashkil qiladi. Prezident Jo Bayden fevral oyida pullarning yarmini 11-sentabr teraktlari qurbonlarining oilalariga ajratish haqida farmon chiqardi, qolgan qismini esa “afg‘on xalqi uchun” zaxira qilib qo‘ydi.
Izoh (0)