АҚШ Давлат департаменти расмий вакили Нед Прайс маълум қилишича, АҚШ 3,5 миллиард доллар миқдоридаги музлатилган маблағларни «Толибон» томонидан назорат қилинувчи Афғонистон Марказий банкига ўтказишни режалаштирмаяпти, аммо мамлакат халқига тўғридан-тўғри фойда келтириш йўлларини қидиради. Бу ҳақда Time хабар берди.
«Биз сақланиб қолган ушбу 3,5 миллиард доллар Афғонистон халқига самарали бориб етиши, террорчилик гуруҳлари ёки бошқалар қўлига тушиб қолмаслигини таъминлаш учун қўллаш мумкин бўлган механизмларни қидирмоқдамиз», — деди Прайс брифингда.
Унинг айтишича, активлар блокдан чиқарилганидан кейин улар масъулият билан ишлатилишига АҚШ ҳозирча ишончи комил эмас.
Прайснинг гаплари шундан дарак берадики, «Ал-Қоида» етакчиси Айман аз-Завоҳирий июль охирида учувчисиз учар қурилма ёрдамида ўлдирилишидан аввал бир қанча вақт давомида Кобул марказида яшагани маълум бўлганидан кейин Байден маъмурияти пулларни бевосита ҳукуматга топшириш бўйича ҳар қандай имкониятлардан воз кечган.
Активлар бир йил аввал Америка қўшинлари Афғонистонни тарк этиб, ҳокимиятни «Толибон» эгаллаб олганидан кейин музлатилган эди. АҚШ расмийлари пул масаласини келишиб олиш бўйича саъй-ҳаракатлар доирасида толиблар етакчилари билан Ўзбекистонда учрашган эди.
Прайснинг сўзларига кўра, Завоҳирийнинг Афғонистонда яшагани толиблар пулларнинг террорчилик гуруҳлар томонидан қўлланилишига тўсқинлик қилмаслиги борасидаги хавотирларни кучайтиради, холос.
Ушбу сумма АҚШ молия муассасаларида сақланаётган 7 миллиард доллар миқдоридаги музлатилган афғон активларининг ярмини ташкил қилади. Президент Жо Байден февраль ойида пулларнинг ярмини 11 сентябрь терактлари қурбонларининг оилаларига ажратиш ҳақида фармон чиқарди, қолган қисмини эса «афғон халқи учун» захира қилиб қўйди.
Изоҳ (0)