Toshkent shahri Yangihayot tumanida probatsiya xizmatida hisobda turuvchi mahkum profilaktika inspektorlariga pichoq bilan tahdid qilgandi. Bosh prokuratura matbuot kotibi Hayot Shamsutdinov holat yuzasidan jinoyat ishi qo‘zg‘atilganini ma’lum qildi.
Voqea 13-avgust kuni yuz bergandi. Tungi xizmatda bo‘lgan Yangihayot tumani IIB ikki nafar profilaktika inspektorlari tushgan xabarga ko‘ra, xonadonlarning biriga borganida, probatsiya xizmatida hisobda turuvchi 35 yoshli mahkum mast holda turmush o‘rtog‘i bilan janjallashib, uni quvib yurganini ko‘rgan va uni tinchlantirmoqchi bo‘lishgan.
Biroq mahkum ularga faol qarshilik ko‘rsatgan va bu jarayonga uning turmush o‘rtog‘i hamda onasi aralashib, profilaktika inspektorlarining xizmat kiyimlarini yirtgan.
Shu paytda mahkum uyidan oshxona pichog‘ini olib chiqib, ikkala qo‘li bilak sohasini kesib, o‘ziga tan jarohati yetkazgan va profilaktika inspektorlariga pichoq bilan tahdid qilib, quvlagan. Profilaktika inspektorlari qo‘shimcha yordam hamda tez tibbiy yordam xodimlarini chaqirgan va jabrlangan mahkum shifoxonaga olib ketilgan.
Hayot Shamsutdinovning ma’lum qilishicha, IIB profilaktika inspektorlariga pichoq bilan tahdid qilgan mahkum va boshqalarga nisbatan Jinoyat kodeksining 219-moddasi 2-qismi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atildi.
Izoh (0)