Ijtimoiy tarmoqlar orqali O‘zbekistonda vaksina olgan fuqarolar uchun 750 ming so‘m miqdorida pul mablag‘i berilayotgani haqida xabarlar tarqalmoqda. Sog‘liqni saqlash vazirligi holat yuzasidan murojaat qilib, aholini yana bir bor internetdagi firibgarlardan ogoh bo‘lishga chaqirdi.
Qayd etilishicha, so‘nggi vaqtlarda ijtimoiy tarmoqlarda odamlar ishonchiga kirib, ularning bank plastik kartalaridagi shaxsiy pul mablag‘larini aldov yo‘li bilan qo‘lga kiritish hollari tez-tez uchramoqda.
Xususan, internetda vaksina olgan fuqarolar uchun 750 ming so‘m miqdorida pul mablag‘i berilayotgani haqidagi asossiz, hech qanday haqiqatga to‘g‘ri kelmaydigan ma’lumotlar ayni ana shu maqsadda takroran tarqatilyapti.
Vazirlik avval ham mazkur yolg‘on axborotlar bo‘yicha bir necha bor o‘z munosabatini bildirgan va aholidan bunday ma’lumotlarga ishonmasliklarini so‘ragan edi. Biroq uydirma xabarlarni tarqatuvchi bu kabi kimsalar odamlar ishonchini qozonish uchun yangi-yangi aldov usullarini qo‘llamoqda. Ya’ni endilikda ular internetda Sog‘liqni saqlash vazirligi nomidan maxsus sahifa ochib, aholini o‘z tuzog‘iga ilintirishga urinyapti.Shu bois vazirlik aholidan yana bir bor bu kabi feyk xabarlarga ishonmaslikni, vaksinatsiya jarayonlari bilan bog‘liq eng to‘g‘ri ma’lumotlarni Sog‘liqni saqlash vazirligining rasmiy ssv.uz sayti hamda Telegram’dagi sahifasi orqali olishlari mumkinligini eslatib o‘tgan.Jumladan, vazirlikning rasmiy veb-sayti bilan bir xil dizaynda tayyorlangan sahifaning asosiy fonida vaksina olganlarga 750 ming so‘m miqdorida pul mablag‘i berilishi aytilgan. Buning uchun shaxsiy ma’lumotlarni kiritish so‘ralgan. Aslida yuqorida keltirilgan axborot firibgarlik maqsadida tarqatilgan bo‘lib, hech qanday rasmiy asosga ega emas, — deyiladi munosabatda.
Izoh (0)