Toshkent shahridagi Forumlar saroyida 13-avgust kuni “Qurilish sohasi xodimlari kuni” munosabati bilan tantanali tadbir bo‘lib o‘tdi, deya xabar bermoqda “Daryo” muxbiri.
Marosim avvalida O‘zbekiston prezidenti Shavkat Mirziyoyevning qurilish sohasi xodimlariga yo‘llagan tabrigini Prezident matbuot kotibi Sherzod Asadov o‘qib eshittirdi.
“Sizlarning timsolingizda shahar va qishloqlarimizda, butun yurtimizda yangi-yangi ishlab chiqarish korxonalari, muhim ijtimoiy obyektlar, zamonaviy uy-joylar, yo‘l va ko‘priklar barpo etib, hayotimizni yanada go‘zal va obod qilishga beqiyos hissa qo‘shib kelayotgan olijanob kasb egalarini ko‘ramiz. Ushbu quvonchli ayyomda sizlarni Yangi O‘zbekiston bunyodkorlari sifatida e’zozlab, sha’ningizga eng yuksak ta’rif va tilaklarimizni izhor etamiz, fidokorona mehnatingiz uchun chin dildan tashakkurlar aytamiz”, – deyiladi prezident tabrigida.
Ta’kidlanishicha, 2022-yilgi investitsiya dasturi bo‘yicha 1 ming 868 ta ijtimoiy obyektda keng ko‘lamli qurilish, rekonstruksiya va kapital ta’mirlash ishlari olib borilmoqda. Loyihalar joylardagi aholi bilan bamaslahat ishlab chiqilgan “Yangi O‘zbekiston” nomidagi jami 29 ta massivda 21 ming 312 xonadonga mo‘ljallangan 619 ta zamonaviy uy-joy, shuningdek, o‘nlab yangi maktabgacha ta’lim tashkilotlari hamda umumta’lim maktablari, tibbiyot muassasalari barpo etilmoqda.
“O‘zshaharsozlik” DT muhandislik kommunikatsiyalar texnologiyasi boshqarmasi boshlig‘i Aziz Orifjonovning “Daryo”ga ma’lum qilishicha, 2030-yilga borib O‘zbekistonda ham rivojlangan mamlakatlarda bo‘lgani kabi osmono‘par va “aqli” shaharlar bunyod etiladi.
“Prezidentimizning bayram tabrigi o‘qib eshittirildi. Bundan g‘ururlandik, xursand bo‘ldik. Biz yanada ko‘proq bunyodkorlik ishlarini olib borishga intilamiz. Qurilish bo‘yicha yangiliklar qilinmoqda. Misol uchun, Farg‘ona, Andijon va Jizzax viloyatlarida kollektorda butun kommunikatsiyalarni olib o‘tish ishlarini bajaryapmiz. Bu kelajakda kommunikatsiyani umrini uzaytiradi. Barcha ishlarni yer osti kollektori orqali amalga oshirsa bo‘ladi. Xususan, quruvchilarga yangi imkoniyatlar ochiladi va yaxshi natijalarga erishiladi. 2030-yilgacha biz Dubaydagi osmono‘par binolar deymizmi, AQSHdagi aqlli uylar deymizmi, umuman, rivojlangan mamlakatlardagi kabi shaharchalar o‘zimizning O‘zbekistonda ham bo‘ladi”, – dedi Aziz Orifjonov.
“O‘zshaharsozlik” loyiha instituti bosh muhandisi Salohiddin Yo‘ldoshev so‘ngi yillarda qurilayotgan binolarga baho berar ekan, ularning nafaqat ko‘lami, balki tashqi ko‘rinishi, sifati, loyihalari bo‘yicha o‘zgarishlar katta ekanini alohida ta’kidladi.
“Avvalari loyihalarda balandligi bo‘yicha chegaralar bo‘lgan. Hozir unday emas. Imkoniyat va talab bo‘lsa, binolarni osmono‘par qilib qurish mumkin. Bunday zamonaviy binolar “Yangi O‘zbekiston” massivlarida ham bor. Bunda, albatta, davlat tomonidan berilayotgan e’tiborning alohida ta’kidlab o‘tish kerak. Biz loyihachilar mana shunday e’tibordagi sohada ekanimizdan xursandmiz. Loyihalarimiz bo‘yicha qurilayotgan binolarni ko‘rganda faxrlanamiz», – dedi loyiha instituti bosh muhandisi.
Tantanali tadbirda ishtirok etgan vazirlik va idora hamda keng jamaotchilik vakillari so‘z olib, qurilish sohasida amalga oshiralyotgan izchil islohotlarni alohida e’tirof etdi, quruvchilarni kasb bayramlari bilan takbrikladi.
Tadbir so‘ngida taniqli san’atkorlar ishtirokida bayram konserti bo‘lib o‘tdi.
Ma’lumot uchun, prezident Shavkat Mirziyoyevning “Qurilish sohasi xodimlari kunini nishonlash to‘g‘risida”gi farmonniga muvofiq, 2017-yildan beri avgust oyining ikkinchi yakshanbasi “Qurilish sohasi xodimlari kuni” sifatida nishonlab kelinmoqda.
Reklama huquqi asosida
Izoh (0)