Тошкент шаҳридаги Форумлар саройида 13 август куни «Қурилиш соҳаси ходимлари куни» муносабати билан тантанали тадбир бўлиб ўтди, дея хабар бермоқда «Дарё» мухбири.
Маросим аввалида Ўзбекистон президенти Шавкат Мирзиёевнинг қурилиш соҳаси ходимларига йўллаган табригини Президент матбуот котиби Шерзод Асадов ўқиб эшиттирди.
«Сизларнинг тимсолингизда шаҳар ва қишлоқларимизда, бутун юртимизда янги-янги ишлаб чиқариш корхоналари, муҳим ижтимоий объектлар, замонавий уй-жойлар, йўл ва кўприклар барпо этиб, ҳаётимизни янада гўзал ва обод қилишга беқиёс ҳисса қўшиб келаётган олижаноб касб эгаларини кўрамиз. Ушбу қувончли айёмда сизларни Янги Ўзбекистон бунёдкорлари сифатида эъзозлаб, шаънингизга энг юксак таъриф ва тилакларимизни изҳор этамиз, фидокорона меҳнатингиз учун чин дилдан ташаккурлар айтамиз», – дейилади президент табригида.
Таъкидланишича, 2022 йилги инвестиция дастури бўйича 1 минг 868 та ижтимоий объектда кенг кўламли қурилиш, реконструкция ва капитал таъмирлаш ишлари олиб борилмоқда. Лойиҳалар жойлардаги аҳоли билан бамаслаҳат ишлаб чиқилган «Янги Ўзбекистон» номидаги жами 29 та массивда 21 минг 312 хонадонга мўлжалланган 619 та замонавий уй-жой, шунингдек, ўнлаб янги мактабгача таълим ташкилотлари ҳамда умумтаълим мактаблари, тиббиёт муассасалари барпо этилмоқда.
«Ўзшаҳарсозлик» ДТ муҳандислик коммуникациялар технологияси бошқармаси бошлиғи Азиз Орифжоновнинг «Дарё»га маълум қилишича, 2030 йилга бориб Ўзбекистонда ҳам ривожланган мамлакатларда бўлгани каби осмонўпар ва «ақли» шаҳарлар бунёд этилади.
«Президентимизнинг байрам табриги ўқиб эшиттирилди. Бундан ғурурландик, хурсанд бўлдик. Биз янада кўпроқ бунёдкорлик ишларини олиб боришга интиламиз. Қурилиш бўйича янгиликлар қилинмоқда. Мисол учун, Фарғона, Андижон ва Жиззах вилоятларида коллекторда бутун коммуникацияларни олиб ўтиш ишларини бажаряпмиз. Бу келажакда коммуникацияни умрини узайтиради. Барча ишларни ер ости коллектори орқали амалга оширса бўлади. Хусусан, қурувчиларга янги имкониятлар очилади ва яхши натижаларга эришилади. 2030 йилгача биз Дубайдаги осмонўпар бинолар деймизми, АҚШдаги ақлли уйлар деймизми, умуман, ривожланган мамлакатлардаги каби шаҳарчалар ўзимизнинг Ўзбекистонда ҳам бўлади», – деди Азиз Орифжонов.
«Ўзшаҳарсозлик» лойиҳа институти бош муҳандиси Салоҳиддин Йўлдошев сўнги йилларда қурилаётган биноларга баҳо берар экан, уларнинг нафақат кўлами, балки ташқи кўриниши, сифати, лойиҳалари бўйича ўзгаришлар катта эканини алоҳида таъкидлади.
«Аввалари лойиҳаларда баландлиги бўйича чегаралар бўлган. Ҳозир ундай эмас. Имконият ва талаб бўлса, биноларни осмонўпар қилиб қуриш мумкин. Бундай замонавий бинолар «Янги Ўзбекистон» массивларида ҳам бор. Бунда, албатта, давлат томонидан берилаётган эътиборнинг алоҳида таъкидлаб ўтиш керак. Биз лойиҳачилар мана шундай эътибордаги соҳада эканимиздан хурсандмиз. Лойиҳаларимиз бўйича қурилаётган биноларни кўрганда фахрланамиз», – деди лойиҳа институти бош муҳандиси.
Тантанали тадбирда иштирок этган вазирлик ва идора ҳамда кенг жамаотчилик вакиллари сўз олиб, қурилиш соҳасида амалга оширалётган изчил ислоҳотларни алоҳида эътироф этди, қурувчиларни касб байрамлари билан такбриклади.
Тадбир сўнгида таниқли санъаткорлар иштирокида байрам концерти бўлиб ўтди.
Маълумот учун, президент Шавкат Мирзиёевнинг «Қурилиш соҳаси ходимлари кунини нишонлаш тўғрисида»ги фармоннига мувофиқ, 2017 йилдан бери август ойининг иккинчи якшанбаси «Қурилиш соҳаси ходимлари куни» сифатида нишонлаб келинмоқда.
Реклама ҳуқуқи асосида
Изоҳ (0)