Buxoro aeroporti chegara bojxona postidan 700 ming Rossiya rublini noqonuniy olib chiqib ketishga uringan fuqaro ushlandi. Bu haqda “Daryo”ga viloyat Bojxona boshqarmasi axborot xizmati rahbari Javohir Ismoilov xabar berdi.
Ta’kidlanishicha, Buxoro aeroporti chegara bojxona postida xorijga otlangan fuqarolarning yashil yo‘lakdagi xatti-harakatlari bojxonachilar tomonidan o‘rnatilgan tartibda bojxona ko‘rigidan o‘tkazilgan. Buxoro shahrida yashovchi A.J.ning harakatlari bojxona xodimlari e’tiborini jalb qilgan. O‘rganilganda u bojxona xodimlariga ma’lum qilinmagan, deklaratsiyada ko‘rsatilmagan naqd xorijiy valyuta — umumiy qiymati 126 million 217 ming so‘m bo‘lgan 700 ming Rossiya rublini noqonuniy olib chiqib ketishga urinayotgani aniqlangan.
“O‘zbekiston Respublikasining ‘Valyutani tartibga solish to‘g‘risida’gi qonuniga muvofiq, Davlat bojxona qo‘mitasi O‘zbekiston Respublikasida valyutani nazorat qiluvchi organlardan biri hisoblanadi. Amaldagi tartiblarga ko‘ra, 100 million so‘m ekvivalentdan ortiq bo‘lmagan summada naqd xorijiy valyutalarni olib chiqishga ruxsat etiladi”, — deydi Javohir Ismoilov.
Hozirda holat yuzasidan bojxona organlari tomonidan surishtiruv harakatlari davom ettirilmoqda.
Izoh (0)