Бухоро аэропорти чегара божхона постидан 700 минг Россия рублини ноқонуний олиб чиқиб кетишга уринган фуқаро ушланди. Бу ҳақда «Дарё»га вилоят Божхона бошқармаси ахборот хизмати раҳбари Жавоҳир Исмоилов хабар берди.
Таъкидланишича, Бухоро аэропорти чегара божхона постида хорижга отланган фуқароларнинг яшил йўлакдаги хатти-ҳаракатлари божхоначилар томонидан ўрнатилган тартибда божхона кўригидан ўтказилган. Бухоро шаҳрида яшовчи А.Ж.нинг ҳаракатлари божхона ходимлари эътиборини жалб қилган. Ўрганилганда у божхона ходимларига маълум қилинмаган, декларацияда кўрсатилмаган нақд хорижий валюта — умумий қиймати 126 миллион 217 минг сўм бўлган 700 минг Россия рублини ноқонуний олиб чиқиб кетишга уринаётгани аниқланган.
«Ўзбекистон Республикасининг ‘Валютани тартибга солиш тўғрисидаъги қонунига мувофиқ, Давлат божхона қўмитаси Ўзбекистон Республикасида валютани назорат қилувчи органлардан бири ҳисобланади. Амалдаги тартибларга кўра, 100 миллион сўм эквивалентдан ортиқ бўлмаган суммада нақд хорижий валюталарни олиб чиқишга рухсат этилади», — дейди Жавоҳир Исмоилов.
Ҳозирда ҳолат юзасидан божхона органлари томонидан суриштирув ҳаракатлари давом эттирилмоқда.
Изоҳ (0)