Yevropa Ittifoqi (YI) 2023-yil boshidan to‘liq kuchga kiradigan Rossiya neftiga embargo qo‘yganidan so‘ng, 2022-yil iyun oyida mayga nisbatan mamlakatdan xom neft va neft mahsulotlari importini oshirdi. Bu haqda “RBK” xabar bermoqda.
Yevrostatning dastlabki ma’lumotlariga ko‘ra, YI mamlakatlari Rossiyadan iyun oyida may oyiga nisbatan 0,4 foizga ko‘p (taxminan 7,3 mln tonna) xom neft import qilgan.
Rossiyadan neft mahsulotlari importi iyun oyida o‘tgan oyga nisbatan 9,7 foizga oshib, 2,65 mln tonnani tashkil etgan.
Yevrostat ma’lumotlariga ko‘ra, iyun oyida Rossiya neft va neft mahsulotlarining YI mamlakatlariga umumiy importi may oyiga nisbatan 2,7 foizga o‘sgan.
2022-yil iyun oyida Rossiyadan YI mamlakatlariga neft importi o‘tgan yilning iyuniga nisbatan 7 foizga, neft mahsulotlari importi esa 24 foizga kam bo‘lgan.
Mablag‘ jihatidan, jahon narxlarining yuqoriligi tufayli Rossiya eksportchilari iyun oyida neft va neft mahsulotlarini YIga sotishdan may yoki aprel oylariga qaraganda 7,23 mlrd yevrodan ortiq daromad oldi.
Germaniya va Italiya Rossiyadan neft va neft mahsulotlari importini sezilarli darajada oshirdi.
Germaniya iyun oyida Rossiya xomashyosini may oyiga nisbatan 12 foizga, Italiya esa xuddi shu oyga deyarli 20 foizga ko‘paytirdi.
Avvalroq AQSH Germaniyaga birinchi marta oltingugurtli neft yetkazib bergani haqida xabar berilgandi.
Izoh (0)