Toshkent markazidagi 68 xonali bino 23 mlrd so‘mga auksionga qo‘yildi

Toshkent shahar, Shayxontohur tumani, Navoiy ko‘chasidagi bino kimoshdi savdosiga qo‘yildi. Lot ma’lumotlari “E-auksion” portalida e’lon qilingan. 

2012-yilda qurilgan bino 2 qavat, 68 ta xona va yerto‘ladan iborat. Bino auksionga iqtisodiy sudlar hukmi bilan Chilonzor tumani MIB tomonidan joylashtirilgan. 

Yer uchastkasining umumiy maydoni — 0,13 gektar. Binoning maydoni — 3 684 kvadrat metr. Unda gaz, suv, elektr ta’minoti va kanalizatsiya tizimi mavjud. 

Auksionga qo‘yilgan binoning boshlang‘ich bahosi — 22,8 mlrd so‘m. Arizalar 5-sentabr 09:00 ga qadar qabul qilinadi. Savdolar xuddi shu kuni 10:00 da boshlanadi.

Avvalroq auksionga qo‘yilgan eng arzon va eng qimmat avtomobillar ro‘yxati aniqlangani haqida xabar berilgandi.