Latviya seymi (parlamenti) Rossiyani terrorizmni qo‘llab-quvvatlovchi mamlakat deb, davlatning Ukraina va boshqa mamlakatlar fuqarolariga nisbatan xatti-harakatlarini esa terrorizm deb tan oldi. Tegishli bayonotni yoqlab 100 deputatdan 67 nafari ovoz berdi, deb yozadi Meduza.
Seymda ovoz berish o‘tkazilishiga “Rossiyaning Ukraina fuqaro shaxslariga va jamoat makoniga maqsadli harbiy hujumlari to‘g‘risida”gi hujjat sabab bo‘ldi, u avvalroq xorijiy masalalar bo‘yicha parlament qo‘mitasi tomonidan ma’qullangan edi.
Hujjatda qayd etilishicha, Rossiya Ukraina aholisi va harbiylarini “insoniylikdan chiqarish”, mahalliy hukumatni bo‘g‘ib qo‘yish va mamlakatni bosib olish uchun zo‘ravonlik qo‘llagan holda Ukraina tinch aholisini maqsadli ravishda ta’qib qilmoqda.
Latviya deputatlari Rossiyaning Ukrainaga bostirib kirishini qoraladi. Bundan tashqari, seym boshqa mamlakatlar hukumatlarini ham undan o‘rnak olishga chaqirdi, Yevroittifoq davlatlarini esa Rossiya va Belarus fuqarolari sayyohlik vizalari amal qilishini zudlik bilan to‘xtatib, ularga kirish vizalari berilishini cheklashga da’vat etdi.
Avvalroq rossiyaliklarga Shengen vizalari berilishini taqiqlash haqidagi taklif Yevroittifoqda muhokamaga qo‘yilgan edi. Taklif nafaqat sayyohlarga, balki jurnalistlar, dissidentlar va Yevroittifoq mamlakatlari fuqarolarining qarindoshlariga ham viza berishni taqiqlashni o‘z ichiga oladi. Taklif avgust oxirida Pragada Yevroittifoq mamlakatlari tashqi ishlar vazirlari uchrashuvida muhokama qilinadi.
Ukraina prezidenti Vladimir Zelenskiy G‘arb mamlakatlari barcha rossiyaliklarga o‘z hududiga kirishni taqiqlashi kerakligini aytgandi. Uning so‘zlariga ko‘ra, shu paytgacha Rossiyaga qarshi kiritilgan sanksiyalarning barchasi Rossiya fuqarolari uchun bir yilga chegaralarni yopish va Rossiya yonilg‘isini sotib olishga to‘liq embargo qo‘yish oldida “kuchsiz” hisoblanadi.
Yevroittifoqning ba’zi mamlakatlari vizalar berishni bahordayoq, urush boshlanganidan keyin deyarli darhol to‘xtatgan edi. Ular orasida barcha Boltiq davlatlari, Chexiya, Slovakiya, Malta bor. Polsha Rossiya fuqarolariga bevosita Rossiyadan yoki Belarusdan mamlakatga kirib kelishni taqiqladi.
Izoh (0)