Qozog‘iston Sanoat va infratuzilma vazirligi, go‘yoki, Ukrainaga yetkazib berilishi uchun Buyuk Britaniyaga qurol sotgani haqidagi ma’lumotni rad etdi, deb yozadi “Interfaks”.
“2021-yilda va 2022-yilning o‘tgan davrida ‘Texnoeksport’ qurol-yarog‘, o‘q-dorilar va harbiy texnika eksportiga litsenziya olish uchun vazirlikka murojaat qilmagan. Bundan tashqari, ko‘rsatilgan davrda vazirlik tomonidan Buyuk Britaniyaga qurol-yarog‘, o‘q-dori va harbiy texnika, aynan esa 122 mm (D-20 gaubitsalari uchun) snaryadlar, 152 mm (D-30 gaubitsalari uchun), “Grad” BM-21 uchun raketalar, BTR-4 (BTR-82A yoki soddalashtirilgan modifikatsiyalar) va 120 mm o‘q-dorilar (minomyotlar va “Konkurs” tankka qarshi boshqariluvchi raketa uchun) eksport qilish uchun litsenziya taqdim etilmagan”, — deya ma’lum qildi Sanoat vazirligi 10-avgust kuni.
Idorada qayd etishlaricha, qurol-yarog‘ va o‘q-dorilar eksporti import qiluvchi mamlakatda u ushbu qurol-yarog‘ va o‘q-dorilarni Qozog‘istonning eksport nazorati sohasidagi vakolatli organi ruxsatisiz qayta eksport qilmasligi haqidagi majburiy qoidani ko‘zda tutuvchi kafolatli majburiyati mavjud bo‘lgan taqdirdagina amalga oshiriladi.
“Vazirlik tomonidan yuqorida tilga olingan qurol-yarog‘ va o‘q-dorilarni qayta eksport qilish uchun ruxsatnoma taqdim etilmagan”, — deya qo‘shib qo‘ydi vazirlik.
Nashr eslatishicha, avvalroq ayrim Telegram-kanallarda Buyuk Britaniya keyinchalik Ukraina hududiga yetkazib berish uchun Qozog‘istondan qurol sotib olayotgani haqida xabarlar tarqalgan edi. Oldi-sotdi, go‘yoki, “Texnoeksport” kompaniyasi vositachiligida amalga oshirilmoqda, 46 million dollarlik shartnoma esa 2022-yil 16-iyulda tuzilgan.
Izoh (0)