AQSH sobiq prezidenti Donald Tramp, Mar-a-Lagodagi qarorgohida o‘tkazilgan tintuvlardan keyin, guvohlik berishdan bosh tortdi, deb yozadi “RBK” The New York Times’ga tayanib.
U fuqarolarga o‘z-o‘ziga qarshi guvohlik bermaslik huquqini beruvchi AQSH Konstitutsiyasiga kiritilgan beshinchi tuzatishni pesh qildi.
Tramp Nyu-York bosh prokurori Letitsiya Jeymsning savollariga javob berar ekan, bir necha soat davomida bitta javobni ta’kidlab turgan.
Shu bilan birga, sobiq davlat rahbari bosh prokurorni mamlakat “tarixidagi eng katta jodugarlar ovi”ni uyushtirishda ayblagan.
“Bir kuni men shunday savol bergandim: ‘Agar aybsiz bo‘lsangiz, unda nega Beshinchi tuzatishdan foydalanyapsiz?’. Buning javobini endi bildim”, — dedi Amerika sobiq yetakchisi. Uning so‘zlariga ko‘ra, hukumat va OAVlar tomonidan ta’qibga uchragani unga jim turishdan boshqa “mutlaqo hech qanday tanlov” qoldirmagan.
FQB agentlari 8-avgust, dushanba kuni Trampning Floridadagi Mar-a-Lago qarorgohida tintuv o‘tkazgan edi. The New York Times vaziyatdan xabardor manbalariga tayanib yozishicha, FQB Trampning uyini u Oq uyni tark etganidan keyin o‘zi bilan olib ketgan hujjatlar tufayli tintuv qilmoqda. Hujjatlarda maxfiy ma’lumotlar bo‘lishi mumkin.
Nashrga ko‘ra, AQSH milliy arxivi “ko‘p oylar davomida” 15 quti hujjatlarni qaytarishni so‘ragan va ushbu hujjatlar yo‘q qilinishi ehtimoli yuzasidan FQBga murojaat qilgan. “Janob Tramp o‘z prezidentligi davrida hukumat arxivlarida saqlanishi kerak bo‘lgan rasmiy qog‘ozlarni yo‘q qilib tashlagani bilan tanilgan”, — deb yozadi gazeta.
Keyinroq hujjatlar qaytarilgan.
Trampning so‘zlariga ko‘ra, agentlar tintuv chog‘ida hatto uning seyfini ham buzib ochgan. Sobiq prezident FQB xatti-harakatlarini siyosiy tusga ega deb atadi. Uning ishonch bildirishicha, amaldagi prezident Jo Bayden FQBning tintuv o‘tkazish niyatidan xabardor bo‘lgan. Agar ish rasman ayblov e’lon qilishgacha borib yetsa, Tramp 2024-yilgi prezidentlik sayloviga o‘z nomzodini qo‘yish imkoniyatidan mahrum bo‘lishi mumkin.
Trampga nisbatan yana bir ish 2021-yil 6-yanvarda Kapitoliyda yuz bergan tartibsizliklar bilan bog‘liq.
AQSHda avvalgi prezidentlik saylovlari 2020-yilning noyabr oyida bo‘lib o‘tgan. Saylov natijalariga ko‘ra, Tramp 232 ta, uning raqibi Jo Bayden 306 ta ovoz to‘plagan. Bayden ovoz berish adolatli o‘tganini ta’kidlaydi.
2021-yilning yanvar oyi boshida Vakillar palatasi saylov natijalarini ma’qullaydigan kuni Tramp tarafdorlari Vashingtonda mitingga yig‘ildi. Namoyishchilar Kapitoliyni egallab oldi, ularga qarshi ko‘zni yoshlatuvchi gaz va shovqinli granatalardan foydalanildi. To‘qnashuvlarda besh kishi halok bo‘lgan. Bayden Trampni zo‘ravonlikka undaganlikda aybladi.
Izoh (0)