Латвия Россияни терроризмни қўллаб-қувватловчи мамлакат деб эълон қилди. Ва Евроиттифоқни россияликларга виза беришни тўхтатишга чақирди

Латвия сейми (парламенти) Россияни терроризмни қўллаб-қувватловчи мамлакат деб, давлатнинг Украина ва бошқа мамлакатлар фуқароларига нисбатан хатти-ҳаракатларини эса терроризм деб тан олди. Тегишли баёнотни ёқлаб 100 депутатдан 67 нафари овоз берди, деб ёзади Meduza.

Сеймда овоз бериш ўтказилишига «Россиянинг Украина фуқаро шахсларига ва жамоат маконига мақсадли ҳарбий ҳужумлари тўғрисида»ги ҳужжат сабаб бўлди, у аввалроқ хорижий масалалар бўйича парламент қўмитаси томонидан маъқулланган эди.

Ҳужжатда қайд этилишича, Россия Украина аҳолиси ва ҳарбийларини «инсонийликдан чиқариш», маҳаллий ҳукуматни бўғиб қўйиш ва мамлакатни босиб олиш учун зўравонлик қўллаган ҳолда Украина тинч аҳолисини мақсадли равишда таъқиб қилмоқда.

Латвия депутатлари Россиянинг Украинага бостириб киришини қоралади. Бундан ташқари, сейм бошқа мамлакатлар ҳукуматларини ҳам ундан ўрнак олишга чақирди, Евроиттифоқ давлатларини эса Россия ва Беларусь фуқаролари сайёҳлик визалари амал қилишини зудлик билан тўхтатиб, уларга кириш визалари берилишини чеклашга даъват этди.

Аввалроқ россияликларга Шенген визалари берилишини тақиқлаш ҳақидаги таклиф Евроиттифоқда муҳокамага қўйилган эди. Таклиф нафақат сайёҳларга, балки журналистлар, диссидентлар ва Евроиттифоқ мамлакатлари фуқароларининг қариндошларига ҳам виза беришни тақиқлашни ўз ичига олади. Таклиф август охирида Прагада Евроиттифоқ мамлакатлари ташқи ишлар вазирлари учрашувида муҳокама қилинади.

Украина президенти Владимир Зеленский Ғарб мамлакатлари барча россияликларга ўз ҳудудига киришни тақиқлаши кераклигини айтганди. Унинг сўзларига кўра, шу пайтгача Россияга қарши киритилган санкцияларнинг барчаси Россия фуқаролари учун бир йилга чегараларни ёпиш ва Россия ёнилғисини сотиб олишга тўлиқ эмбарго қўйиш олдида «кучсиз» ҳисобланади.

Евроиттифоқнинг баъзи мамлакатлари визалар беришни баҳордаёқ, уруш бошланганидан кейин деярли дарҳол тўхтатган эди. Улар орасида барча Болтиқ давлатлари, Чехия, Словакия, Мальта бор. Польша Россия фуқароларига бевосита Россиядан ёки Беларусдан мамлакатга кириб келишни тақиқлади.