Dushanbe shahrida 10-avgust kuni AQSH Qurolli kuchlari Markaziy qo‘mondonligi “Mintaqaviy hamkorlik—2022” harbiy mashqlarini boshladi. Bu haqda AQSHning Tojikistondagi elchixonasi xabar berdi.
AQSH elchisi Jon Mark Pommersheym Markaziy qo‘mondonlik tomonidan tashkil etilgan va Tojikiston mezbonlik qilayotgan ushbu harbiy mashg‘ulotlar ishtirokchilarini qutlagan. Mashqlar 10—20-avgust kunlari bo‘lib o‘tadi.
Ta’kidlanishicha, mintaqaviy hamkorlik mashqlari ko‘pmillatli barqarorlik operatsiyalarini mustahkamlash, terrorizmga qarshi kurash, Markaziy va Janubiy Osiyo davlatlari, AQSH va boshqa ishtirokchi davlatlar o‘rtasida hamkorlik va birgalikdagi imkoniyatlarni rivojlantirishga qaratilgan yillik mashg‘ulot hisoblanadi.
AQSH, Tojikiston, Qozog‘iston, Qirg‘iziston, Mo‘g‘uliston, Pokiston va O‘zbekiston ishtirokchilari olti kunlik qo‘mondonlik-shtab o‘quv mashqlarida qatnashadi. Tojikiston va AQSH Faxroboddagi o‘quv markazida besh kunlik ikki tomonlama dala mashg‘ulotlarini ham o‘tkazadi. Jarayon quyidagilarga qaratilgan:
- mintaqaviy xavfsizlik va barqarorlikni mustahkamlash;
- ommaviy qirg‘in qurollari, terrorizm elementlari va giyohvand moddalarni ushlab qolish bo‘yicha milliy imkoniyatlar va majburiyatlarni oshirish;
- xalqaro tinchlikparvar operatsiyalarda va axborot almashishda mintaqaviy mudofaa kuchlarini rivojlantirishga yordam berish.
Izoh (0)