Ўзбекистоннинг бугунги суд тизими катта ислоҳотларга муҳтож. Бу ҳақда Президент администрацияси раҳбарининг ўринбосари Комил Алламжонов Telegram'даги каналида пост қолдирди.
Комил Алламжоновнинг ёзишича, бугун, 11 август куни администрация раҳбари Сардор Умрзоқов бошчилигида суд тизими масаласида йиғилиш ўтказилмоқда.
«Адолатли суд тизимисиз ҳеч қандай ривожланиш бўлмайди. Ва бугунги суд тизими катта ислоҳотларга муҳтож. Айни дақиқаларда Сардор Умрзоқов куни кеча Сенат томонидан тасдиқланган Олий суднинг янги раиси Бахтиёр Исломовни жамоага таништирмоқда. Йиғилиш жуда кескин ва танқидий ўтяпти. Чунки бугун жамоатчиликнинг аксарияти суд тизимидан мутлақо норози. П.С. Хатоларни тузатиш пайти келди» – деб ёзган у.
Олий Мажлис қонунчилик палатаси депутати Расул Кушербаев мазкур хабарга муносабат билдирди.
«Худди шундай. Афсуски ислоҳот ва ўзгаришларни бошида бўлиши керак бўлган бу соҳада анча кеч қолдик: суд қўл бошқарувига ўтиб қолгандек. Бироқ ҳечдан кўра кеч яхши. Кўрамиз бундан буён суддан одамларнинг розилиги ортадими йўқми», – дея қайд этди депутат.
Шунингдек, «Давлетовуз» каналида ҳам Комил Алламжоновнинг хабарига фикр билдирилди.
«Жамоатчилик Ўзбекистондаги суд тизимидан норози. Судларнинг мустақиллиги борасида кўп йиллар давомида саволлар пайдо бўлган. Адолатсиз қарорлар натижасида тизимга шикоятлар ҳаддан ташқари кўпайиб кетган. Шу маънода бугунги йиғилиш ҳам ўта танқидий руҳда ўтаётгани маълум қилинди. Ислоҳ қилиниши керак бўлган соҳалар жуда кўп, лекин менимча, уларнинг ичида энг кўп ислоҳотлар айнан суд тизимида амалга оширилиши керак. Мустақил, адолатли суд бўлмас экан, биз хоҳлаган жамиятни ярата олмаймиз. Янги раҳбар олдида ҳал қилиниши лозим бўлган улкан масъулиятли вазифа турибди», – деб ёзади муаллиф.
Аввалроқ Бахтиёр Исломов Олий суд раиси этиб сайлангани хабар қилинганди.
Изоҳ (0)