Samarqand viloyat ko‘p tarmoqli tibbiyot markazida birinchi marotaba markaz transplantologlari va Samarqand davlat tibbiyot universiteti xodimlari hamkorlikda jigar ko‘chirib o‘tkazish amaliyoti o‘tkazildi. Bu haqda “Daryo”ga viloyat sog‘liqni saqlash boshqarmasi axborot xizmati ma’lum qildi.
1965-yilda tug‘ilgan bemor Saodat Lapasova jigar sirrozi, subkompensatsiya bosqichi bilan kasallangan bo‘lib, unga 1987-yilda tug‘ilgan qizi Nafisa Qurbonova donorlik qilgan.
9-avgust kuni bo‘lib o‘tgan operatsiya 13 soat 20 daqiqa davom etgan. Operatsiyada 25 nafarga yaqin tibbiyot xodimlari ishtirok etgan.
“Biz murakkab amaliyotni muvaffaqiyatli yakunladik. Bu Samarqand tibbiyotida yana bir yangilik bo‘ldi. Jigar transplantatsiyasi amaliyotini bajarishga har tomonlama puxta tayyorgarlik ko‘rdik. Buning uchun xodimlarimiz Moskva, Qozon, Kiyev, Istanbul, Anqara shaharlarida malaka oshirib keldi. Qolaversa, akademik Vohidov nomidagi Respublika xirurgiya ilmiy amaliy markazining professor xodimlari bizni qo‘llab-quvvatladi. Bemor Lapasovada jigar sirrozi, subkompensatsiya bosqichi edi. Shukrki, mazkur amaliyot muvaffaqiyatli o‘tdi. Hozirgacha bo‘lgan tekshiruv natijalarning barchasi ijobiy”, — deydi viloyat ko‘p tarmoqli tibbiyot markazi bosh vrachi, Samarqand davlat tibbiyot universiteti kafedrasi mudiri Lutfullo Mahmonov.
Lutfullo Mahmonovning ta’kidlashicha, markazlashgan holda va viloyat hokimligi homiyligi ostida inson organlarini ko‘chirib o‘tish amaliyotlari uchun markazga 10 milliard so‘mlik tibbiy asbob uskunalar olib kelib o‘rnatilgan.
Izoh (0)