Илон Маскнинг SpaceX компанияси 52 та Starlink сунъий йўлдошини коинотга юборди

Американинг SpaceX компанияси Ер орбитасига яна 52 та Starlink интернет сунъий йўлдошларини чиқарди, деб ёзади «РБК».

Бортига сунъий йўлдошлар ортилган Falcon 9 ракетаси 9 август куни 22:14 да (Тошкент вақти билан 10 август 7:14 да) Флорида штатидаги Кеннеди космик маркази космодромидан учирилди. Сал аввалроқ старт тахминан уч соатга кечиктирилган эди.

Компания мунтазам равишда Falcon 9 ракетасида коинотга турли сунъий йўлдошларни учиради. Чунончи, февраль ойида Италиянинг COSМО-Skymed радиолокация сунъий йўлдоши учирилганди. Шунингдек, SpaceX сайёрани астероидлардан ҳимоя қилиш учун зондларни ҳам у орқали коинотга чиқарган.

Йил бошидан буён SpaceX кўп марта бортига ўнлаб сунъий йўлдошлар ортилган Falcon 9 ракеталарини коинотга юборган. Парвозлар 19 январда, 2 апрелда, 6 ва 14 майда амалга оширилган.

SpaceX коинотга 2 мингдан ортиқ Starlink сунъий йўлдошларини чиқаришга улгурган, аммо уларнинг ҳаммаси ҳам ишламайди ёки зарур орбитада эмас. Январь ўрталарида SpaceX раҳбари Илон Маск коинотга учирилган сунъий йўлдошларнинг фақат 1469 таси фаол эканини, яна 272 таси зарур орбиталарга қараб ҳаракатланаётганини айтганди.

Starlink — глобал юқори тезликли интернет билан таъминлаш мақсадидаги сунъий йўлдошлар тизимини яратиш бўйича лойиҳа. Сунъий йўлдошлар 550 км баландликдаги орбитага жойлаштирилмоқда, 2020 йиллар ўрталарига келиб, компания бундай қурилмалардан 12 мингтасини орбитага чиқармоқчи.