Республикада 5 миллион 500 минг нафар ўқувчи ўрни мавжуд. Ўқувчи болаларнинг сони эса 6 миллион нафардан ортиқ. Бу ҳақда Халқ таълим вазирининг биринчи ўринбосари Усмон Шарифхўжаев «Дарё» мухбирига берган интервьюсида айтиб ўтди.
«Дарё» мухбири Усмон Шарифхўжаевдан республика бўйлаб мактабларда ўқувчи болалар тўлиқ қамраб олинмагани, ҳали ҳам бу борада камчиликлар борлиги ва мактаблар етишмовчилиги ҳақида сўради.
Халқ таълим вазири биринчи ўринбосарининг айтишича, «Таълим тўғрисидаги» қонун бўйича 1—11-синфлар учун мажбурий таълим белгиланган.
«Мен ҳозир 100 фоиз қамров бўлган десам, ёлғон бўлиши мумкин. Сабаби, ўқишга ота-онаси томонидан чеклов қўйилаётган, мактабга юборилмайдиган болалар бўлиши мумкин. Бизга 10-11 ёшда ҳам ҳали мактабга чиқмаган деган ҳолат билан келишади. Лекин улар, масалан, 6 миллион нафар мактаб болаларининг ичида 100 та бўлиши мумкин. Яна бир масала – ўқув ўрни масаласи. Республикада ҳозир 5 миллион 500 минг нафар атрофида ўқувчи ўрни бор. Болаларнинг сони 6 миллион нафардан ортиқ, янги ўқув йилидан яна ошади. Кўриниб турибдики, агар бутун республикани бўлсангиз бирга-бир тушмайди. Агар шундай тушганида барча мактабларда бир смена дарс бўлар эди. Бу ҳам нисбий, чунки қайсидир мактабда 0,7, қайсидир бирида 1, қайсидирида 2 коэффициэнт бўлиши мумкин. Умумий оладиган бўлсак, 5,5 миллион ўринга 6,2 миллион нафар бола бор», — дейди у.
Усмон Шарифхўжаевнинг сўзларига кўра, 2022—2026 йилларга мўлжалланган «Мактабларни ривожлантириш миллий дастури» қабул қилинган.
«Давлатимиз раҳбарининг фармонида 1,2 миллион қўшимча ўқувчи ўрни вазифаси белгиланган. Ўзимизнинг алоҳида қароримизда бунинг аниқ рақамлари бор, давлат бюджетининг ҳисобидан кейинги 5 йилда 700—800 минг ўрин яратиш аниқ белгиланган. Қолган ўринлар қандай шаклланади деган савол туғилиши мумкин. Йилдан йилга орттирилган бюджет, ташаббускор ўқув бюджети томонидан қўшимча ўқувчи ўринлари яратиш имконияти пайдо бўлади. Бундан ташқари хусусий мактаблар бор, уларни ҳам ривожлантириб, уларга ҳам шароитлар қилинмоқда. Уларнинг ҳам ҳар бир мактаби очилса 400—500 ўқувчи ўрни қўшимча бўлади. Чунки биз жами ўқувчи ўрнини санашимиз керак бўлади. Режа бор, кўп жиҳатлар маблағга бориб тақалади. Мактабларнинг самарали қурилиши, керак жойларга қурилиши, ўз навбатида келгусида борган сари ўқувчи ўрнига бўлган эҳтиёжни пасайтиришга қаратилган», — дейди халқ таълим вазирининг биринчи ўринбосари.
Мутасаддининг таъкидлашича, мактабларни битираётган ўқувчиларга нисбатан келаётган ўқувчилар сони ҳар йили 40—50 минг нафарга ошиб боради.
«Бу биз учун олдимизга катта вазифалар қўяётган масала. Бу фақатгина Халқ таълим вазирлиги даражасидаги масала эмас, буни Қурилиш вазирлиги, ҳокимликлар даражасида бирга ҳал қилишимиз керак. Биз эҳтиёжимиз борлигини айтишга тайёрмиз, қаерда нима муаммо эканлигини кўрсатамиз. Лекин қурилиш масаласи борган сари ҳудудларга, аҳолининг эҳтиёжларига мослашаётганлиги инобатга олсак, уларда ҳам бунга иштиёқ ва таклиф бўлса яхши бўлар эди», — дея қўшимча қилади Усмон Шарифхўжаев.
Изоҳ (0)