Maktab formasini joriy etish kechiktirilishi bo‘yicha tegishli qarorga tez orada o‘zgartishlar kiritilishi ma’lum qilindi

Maktab formasini joriy etish kechiktirilishi bo‘yicha tegishli qarorga tez orada o‘zgarishlar kiritiladi. Bu haqda xalq ta’lim vaziri Baxtiyor Saidov 8-avgust kuni AOKAda bo‘lib o‘tgan matbuot anjumanida aytib o‘tdi, deb xabar bermoqda “Daryo” muxbiri.

2022-yilning 27-iyul kuni xalq ta’limi vaziri Baxtiyor Saidov yagona maktab formasini majburiy joriy etish kechiktirilishini ma’lum qilgandi. Ammo hozirga qadar bu boradagi hukumat qaroriga hozircha o‘zgarish kiritilmagan.

Baxtiyor Saidov matbuot anjumanida ushbu holat yuzasidan izoh berib, Vazirlar Mahkamasining qarori chiqishi uchun o‘zining protsedurasi borligini aytdi.

Men ham vazir sifatida hukumat a’zosi hisoblanaman. Men ham xalq ta’limi vaziri sifatida, ham hukumat a’zosi sifatida o‘sha bayonotni berdim. Bayonotni berganim keng jamoatchilikning xohish-irodasi va vaziyatdan kelib chiqib, qilingan bayonot edi.

To‘g‘ri, avval qaror chiqqan va u kuchga ega. Qayd etishim kerak, Vazirlar Mahkamasining qarorining loyihasini tayyorlab, uni chiqarish uchun ozgina vaqt talab qiladi.

Shundan kelib chiqib, albatta, bayonotda gapirilgan gaplar Vazirlar Mahkamasining boshqa qarorlar loyihasi kiritilganda, albatta, o‘zining aksini topadi.

Bu hali qilinmadi demoqchimasman, qilinib bo‘lgan, yaqinda eshitasizlar. Ya’ni bu bayonot qonuniy tarzda hujjatda ham aks etadi

Xalq ta’lim vaziri, Baxtiyor Saidov