Rossiya prezidenti Vladimir Putin Armaniston bosh vaziri Nikol Pashinyan bilan muzokaralar doirasida Tog‘li Qorabog‘dagi vaziyatni tartibga solish bo‘yicha Ozarbayjon ishtirokidagi uch tomonlama kelishuvlarni muhokama qildi, deb yozadi “RBK”.
“Rossiya, Armaniston va Ozarbayjon yetakchilari o‘rtasida 2020-yil 9-noyabrida, 2021-yil 11-yanvari va 26-noyabrida erishilgan kelishuvlarning barcha nizomlari amalga oshirilishi muhimligi tasdiqlandi”, — deyiladi Kreml xabarida.
Siyosatchilar tan olinmagan respublika atrofidagi vaziyatning umumiy borishini muhokama qildi va arman-ozarbayjon chegarasida xavfsizlikni ta’minlash masalasiga to‘xtaldi.
Kreml matbuot xizmati qayd etishicha, muzokaralar Yerevan tashabbusi bilan bo‘lib o‘tgan.
Putin va Pashinyan muhokama qilgan 2020—2021-yillardagi uch tomonlama shartnomalar Ozarbayjon va Armaniston o‘rtasida yana bir bor nizo kuchayganidan keyin tuzilgan edi.
2022-yilda Boku va Yerevan tinchlik haqidagi muzokaralarni faollashtirdi, shunga qaramay respublikaning alohida tumanlarida vaziyat vaqti-vaqti bilan keskinlashib turdi. Tomonlar bir necha marta Bryusselda uchrashdi (Yevroittifoq bu masalada vositachilik qilmoqda). May oyida arman hukumati Ozarbayjon bilan chegaralar demarkatsiyasi va xavfsizligi masalalari bo‘yicha komissiyani ishga tushirishga kelishib oldi.
Biroq avgustda vaziyat yana keskinlashdi. 3 va 4-avgust kunlari Rossiya Mudofaa vazirligi Ozarbayjonni o‘t ochishni to‘xtatish rejimini buzishda aybladi. Boku Tog‘li Qorabog‘da “Qasos” operatsiyasini o‘tkazib, hududning qurolsizlantirilishiga erishmoqchi bo‘ldi. Mamlakat hukumati da’vo qilishicha, Qorabog‘da armanistonlik harbiy xizmatchilar va rossiyalik tinchlikparvarlar bor. Yerevan u yerda harbiylari borligini rad etmoqda.
Ikki davlat harbiylari va siyosatchilari bir-birini provokatsiyalarda ayblashda davom etmoqda. Boku 7-avgust kuni Armaniston Mudofaa vazirligining ikki mamlakat chegarasida go‘yoki Ozarbayjon qo‘shinlari boshlagan otishmalar haqidagi ma’lumotlarini rad etdi.
Mavzuga doir:
Izoh (0)