Rossiya aviakompaniyalari, jumladan, Aeroflot ham sanksiyalar tufayli sotib ololmaydigan ehtiyot qismlari uchun boshqa samolyotlarini buzib tashlashni boshlagan. Bu haqda sanoatdagi manbalarga tayanib, Meduza xabar bermoqda.
Hozirda Aeroflot kamida bitta Sukhoi Superjet-100 va bitta Airbus-A350 samolyotlarini demontaj qilgan (ular “deyarli yangi” edi, deya ta’kidlaydi manba). Uskunalar bir juft Boeing-737 va Airbus-A320 samolyotlaridan ham olib tashlangan.
Shuningdek, Rossiyaning boshqa aviakompaniyalari qaysi samolyotlarni demontaj qilishni boshlagani hozircha aniqlanmagan.
Flightradar xizmati ma’lumotlariga ko‘ra, iyul oyi oxiridan beri Aeroflot o‘zining 50 ga yaqin samolyotlarini ishlatmagan. Kompaniyaning yettita Airbus-A350 samolyotidan uchtasi (jumladan, bittasi hozirda ehtiyot qismlar uchun ajratilgan) uch oydan beri uchmagan, deb yozadi Reuters.
Ma’lumot uchun:
- Fevral oyi oxirida Yevropa Ittifoqi rus samolyotlari uchun o‘z havo yo‘llarini yopdi, ular uchun ehtiyot qismlarni yetkazib berishni, texnik xizmat ko‘rsatishni va sug‘urtalashni taqiqladi, shuningdek, lizing kompaniyalarini Rossiya aviatashuvchilari uchun ijaraga olingan samolyotlarni qaytarishni majbur qilgan.
- May oyida Bloomberg agentligi ekspert hisob-kitoblariga tayanib, Boeing va Airbus avialaynerlari uchun butlovchi qismlar yetishmasligi sababli Aeroflot yoz oxirigacha o‘z samolyotlarini qismlarga ajratishni boshlashi kerakligini xabar qilgan edi.
- Iyul oyida bosh vazir o‘rinbosari Yuriy Borisov, transport vazirligi hisob-kitoblariga ko‘ra Rossiya aviakompaniyalari mavjud Airbus va Boeing samolyotlari parkini besh yil davomida xafvsiz boshqarishi mumkinligini e’lon qilgan edi.
Izoh (0)