Urush boshlanganidan beri Rossiya armiyasining Ukrainadagi halok bo‘lganlar va yaradorlar soni 70-80 ming kishini tashkil etdi, dedi AQSH mudofaa vazirining siyosiy masalalar bo‘yicha o‘rinbosari Kolin Kal. Bu haqda CNN xabar bermoqda.
Ruslar urushda olti oydan kamroq vaqt ichida 70 yoki 80 ming kishini yo‘qotdi, deb hisoblash uchun asos bor”, — deydi Kolin Kal.Uning so‘zlariga ko‘ra, gap halok bo‘lganlar va yaradorlarning taxminiy yo‘qotishlari haqida ketmoqda.
Vazir o‘rinbosari bunday yo‘qotishlarni “sezilarli” deb atadi va Rossiyaning Ukrainaga bostirib kirishida mamlakat prezidenti Vladimir Putin e’lon qilgan maqsadlarining birortasiga ham erishmaganini ta’kidlagan.
Afg‘onistondagi urushda Sovet armiyasining yo‘qotishlari ham taxminan xuddi shunday edi. Faqat o‘sha urush deyarli 10 yilni o‘z ichiga olgan. Moskva “maxsus operatsiya” deb ataydigan harakatlar esa olti oydan kamroq vaqtdan beri davom etmoqda.
Rasmiy ma’lumotlarga ko‘ra, Afg‘onistonda 1979–1989-yillarda 15 mingga yaqin sovet askari halok bo‘lgan, 50 mingdan ziyodi yaralangan.
Bundan keyingi Rossiya olib borgan urushlarda Moskvaning harbiy yo‘qotishlari kamroq bo‘lgan. Memorial ma’lumotlarga ko‘ra, birinchi Chechen urushida 4 ming 300 dan ortiq odam halok bo‘lgan bo‘lsa yana 1 ming 200 kishi bedarak yo‘qolgan va 19 mingdan ortiq odam yaralangan. Ikkinchi Chechen urushida esa, Mudofaa vazirligi ma’lumotlariga ko‘ra, 4,5 mingdan ortiq odam nobud bo‘lgan, 15,5 mingdan ortiq askar yaralangan.
Ma’lumot uchun:
- Iyul oyi oxirida Markaziy razvedka boshqarmasi direktori Uilyam Berns Rossiyaning Ukrainadagi yo‘qotishlari haqida: 45 mingga yaqin askar yarador bo‘lishi mumkinligini aytgan edi. Britaniya Mudofaa vaziri Ben Uolles ham aprel oyi oxirida Ukrainada 15 ming rossiyalik nobud bo‘lganini ma’lum qilgan.
- “Mediazona” va BBC 8-avgustga qadar ochiq ma’lumotlar asosida Ukrainada rossiyalik 5424 askar va zobit halok bo‘lganini tasdiqladi.
- Rossiya Mudofaa vazirligi yo‘qotishlar haqidagi ma’lumotlarni oxirgi marta urush boshlanganidan bir oy o‘tib keltirgan edi. 25-martga kelib, agentlik ma’lumotlariga ko‘ra, 1351 kishi halok bo‘lgan, 3825 askar yaralangan.
Izoh (0)