Seul va unga tutash hududlarda so‘nggi 80 yildagi eng kuchli jala oqibatida yetti kishi halok bo‘ldi, yana olti kishi bedarak yo‘qolgan. Bu haqda mahalliy hokimiyatga tayanib, Yonhap agentligi xabar bermoqda.
Dushanba (8-avgust) kuni kechqurun Seul, uning g‘arbidagi port shahar Incheon va poytaxtni o‘rab turgan Kyonngido provinsiyasiga soatiga 100 millimetrdan ortiq yomg‘ir yog‘gan. Tondjakku markazida esa bir soat ichida 141,5 millimetr yomg‘ir yog‘di. Bu 1942-yildan beri eng yuqori ko‘rsatkichdir.
Hukumat ma’lumotlariga ko‘ra, Seuldagi jala besh kishining hayotiga zomin bo‘lgan va to‘rt kishi bedarak yo‘qolgan, Kyongi provinsiyasida esa ikki kishi halok bo‘lgan va yana ikki kishi bedarak yo‘qolgan. Kyongidoda ham 9 kishi jarohatlangan. 150 nafar odam tunda uysiz qolib, maktab va boshqa davlat muassasalarida tunashga majbur bo‘ldi.
Yomg‘ir tufayli temiryo‘l aloqasi uzilib, bir nechta metro bekati suv ostida qolgan, 80 ta yo‘l uchastkasi to‘sib qo‘yilgan. Seshanba (9-avgust) kuni ertalab 19 ta parom yo‘nalishi yopildi.
Koreya meteorologiya boshqarmasi ma’lumotlariga ko‘ra, ertalab soat 6:00 holatiga ko‘ra, mamlakatning ayrim hududlarida soatiga 50 mm gacha yomg‘ir yog‘gan. Seulda jami yog‘ingarchilik dushanba va seshanba kuni soat 8:00gacha esa 422 mm ga yetdi. Chorshanba (10-avgust) kuni poytaxt hududi va Gangvon provinsiyasida 300 millimetrdan ko‘proq yomg‘ir yog‘ishi kutilmoqda.
Chxunchxon provinsiyasining shimoliy qismlari va Shimoliy Gyonsang provinsiyasining shimoli-g‘arbida ham 200 mm gacha yog‘ingarchilik bilan kuchli yomg‘ir yog‘ishi mumkin.
Seshanba (9-avgust) kuni ertalab Janubiy Koreya o‘rmon xizmati mamlakat bo‘ylab 47 ta shahar va tumanlarda ko‘chki xavfi haqida ogohlantirdi.
Ayni paytda Shimoliy Koreya davlat matbuoti ham ularning janubiy hududlarida kuchli yog‘ingarchilik haqida ogohlantirgan.
Koreya markaziy radioeshittirish stansiyasi ma’lumotlariga ko‘ra, ogohlantirish janubi-g‘arbiy, shimoliy va janubiy Xvanxe provinsiyalari, sharqiy Gangvondo provinsiyasining ba’zi janubiy hududlari va chegaradagi Keson shahri uchun berilgan. Ushbu hududlarda 50 dan 80 mm gacha yog‘ingarchilik bo‘lishi kutilmoqda.
Rodong Sinmun gazetasi bir kun oldin Pxenyandagi jalalarni “halokatli” ob-havo deb atadi va zararga qarshi ehtiyotkor profilaktika choralarini ko‘rishga chaqirdi.
Mavzuga doir: Moskvada yomg‘ir paytida 13 nafar ishchi kanalizatsiya qudug‘iga tushib ketdi. Uch kishi halok bo‘ldi
Izoh (0)