Россия президенти Владимир Путин Арманистон бош вазири Никол Пашинян билан музокаралар доирасида Тоғли Қорабоғдаги вазиятни тартибга солиш бўйича Озарбайжон иштирокидаги уч томонлама келишувларни муҳокама қилди, деб ёзади «РБК».
«Россия, Арманистон ва Озарбайжон етакчилари ўртасида 2020 йил 9 ноябрида, 2021 йил 11 январи ва 26 ноябрида эришилган келишувларнинг барча низомлари амалга оширилиши муҳимлиги тасдиқланди», — дейилади Кремль хабарида.
Сиёсатчилар тан олинмаган республика атрофидаги вазиятнинг умумий боришини муҳокама қилди ва арман-озарбайжон чегарасида хавфсизликни таъминлаш масаласига тўхталди.
Кремль матбуот хизмати қайд этишича, музокаралар Ереван ташаббуси билан бўлиб ўтган.
Путин ва Пашинян муҳокама қилган 2020—2021 йиллардаги уч томонлама шартномалар Озарбайжон ва Арманистон ўртасида яна бир бор низо кучайганидан кейин тузилган эди.
2022 йилда Боку ва Ереван тинчлик ҳақидаги музокараларни фаоллаштирди, шунга қарамай республиканинг алоҳида туманларида вазият вақти-вақти билан кескинлашиб турди. Томонлар бир неча марта Брюсселда учрашди (Евроиттифоқ бу масалада воситачилик қилмоқда). Май ойида арман ҳукумати Озарбайжон билан чегаралар демаркацияси ва хавфсизлиги масалалари бўйича комиссияни ишга туширишга келишиб олди.
Бироқ августда вазият яна кескинлашди. 3 ва 4 август кунлари Россия Мудофаа вазирлиги Озарбайжонни ўт очишни тўхтатиш режимини бузишда айблади. Боку Тоғли Қорабоғда «Қасос» операциясини ўтказиб, ҳудуднинг қуролсизлантирилишига эришмоқчи бўлди. Мамлакат ҳукумати даъво қилишича, Қорабоғда арманистонлик ҳарбий хизматчилар ва россиялик тинчликпарварлар бор. Ереван у ерда ҳарбийлари борлигини рад этмоқда.
Икки давлат ҳарбийлари ва сиёсатчилари бир-бирини провокацияларда айблашда давом этмоқда. Боку 7 август куни Арманистон Мудофаа вазирлигининг икки мамлакат чегарасида гўёки Озарбайжон қўшинлари бошлаган отишмалар ҳақидаги маълумотларини рад этди.
Изоҳ (0)