Сеул ва унга туташ ҳудудларда сўнгги 80 йилдаги энг кучли жала оқибатида етти киши ҳалок бўлди, яна олти киши бедарак йўқолган. Бу ҳақда маҳаллий ҳокимиятга таяниб, Yonhap агентлиги хабар бермоқда.
Душанба (8 август) куни кечқурун Сеул, унинг ғарбидаги порт шаҳар Инчеон ва пойтахтни ўраб турган Кённгидо провинциясига соатига 100 миллиметрдан ортиқ ёмғир ёғган. Тонджакку марказида эса бир соат ичида 141,5 миллиметр ёмғир ёғди. Бу 1942 йилдан бери энг юқори кўрсаткичдир.
Ҳукумат маълумотларига кўра, Сеулдаги жала беш кишининг ҳаётига зомин бўлган ва тўрт киши бедарак йўқолган, Кёнги провинциясида эса икки киши ҳалок бўлган ва яна икки киши бедарак йўқолган. Кёнгидода ҳам 9 киши жароҳатланган. 150 нафар одам тунда уйсиз қолиб, мактаб ва бошқа давлат муассасаларида тунашга мажбур бўлди.
Ёмғир туфайли темир йўл алоқаси узилиб, бир нечта метро бекати сув остида қолган, 80 та йўл участкаси тўсиб қўйилган. Сешанба (9 август) куни эрталаб 19 та паром йўналиши ёпилди.
Корея метеорология бошқармаси маълумотларига кўра, эрталаб соат 6:00 ҳолатига кўра, мамлакатнинг айрим ҳудудларида соатига 50 мм гача ёмғир ёғган. Сеулда жами ёғингарчилик душанба ва сешанба куни соат 8:00гача эса 422 мм га етди. Чоршанба (10 август) куни пойтахт ҳудуди ва Гангвон провинциясида 300 миллиметрдан кўпроқ ёмғир ёғиши кутилмоқда.
Чхунчхон провинциясининг шимолий қисмлари ва Шимолий Гёнсанг провинциясининг шимоли-ғарбида ҳам 200 мм гача ёғингарчилик билан кучли ёмғир ёғиши мумкин.
Сешанба (9 август) куни эрталаб Жанубий Корея ўрмон хизмати мамлакат бўйлаб 47 та шаҳар ва туманларда кўчки хавфи ҳақида огоҳлантирди.
Айни пайтда Шимолий Корея давлат матбуоти ҳам уларнинг жанубий ҳудудларида кучли ёғингарчилик ҳақида огоҳлантирган.
Корея марказий радиоэшиттириш станцияси маълумотларига кўра, огоҳлантириш жануби-ғарбий, шимолий ва жанубий Хванхе провинциялари, шарқий Гангвондо провинциясининг баъзи жанубий ҳудудлари ва чегарадаги Кесон шаҳри учун берилган. Ушбу ҳудудларда 50 дан 80 мм гача ёғингарчилик бўлиши кутилмоқда.
Rodong Sinmun газетаси бир кун олдин Пхеньяндаги жалаларни «ҳалокатли» об-ҳаво деб атади ва зарарга қарши эҳтиёткор профилактика чораларини кўришга чақирди.
Мавзуга доир: Москвада ёмғир пайтида 13 нафар ишчи канализация қудуғига тушиб кетди. Уч киши ҳалок бўлди
Изоҳ (0)