Norvegiya qiroli Xarald V yuqori harorat bilan kasalxonaga yotqizildi, uning holati barqaror deb baholanmoqda, deb yozadi “RBK” qirollik oilasi matbuot xizmatiga tayanib.
“Qirol oliy janoblari bugun yuqori harorat tufayli Milliy gospital (Oslo universiteti kasalxonasi)ga yotqizildi. Uning ahvoli barqaror”, — deyiladi xabarda.
Qirol aynan qanday kasallikka chalinganiga aniqlik kiritilmadi. Shu yilning mart oyida monarx koronavirus bilan kasallanib o‘tgan edi.
Xarald V 85 yoshda. U 1981-yildan buyon Norvegiyaga hukmronlik qilib keladi. Mamlakatni natsistlar Germaniyasi istilo qilgan vaqtda bo‘lg‘usi qirol AQSHga emigratsiya qilib, bolaligini o‘sha yerda o‘tkazgan. Xarald V yelkanli sportga qiziqadi, mamlakat termasi bilan birgalikda uch marta Olimpiya o‘yinlarida qatnashgan. Norvegiya qiroli huquqi ostida Xarald V har yili tinchlik bo‘yicha Nobel mukofotini topshirish marosimida ishtirok etadi.
Norvegiyada qirol Konstitutsiyaga muvofiq, davlat va ijro etuvchi hokimiyat rahbari hisoblanadi. Ammo unga yuklangan majburiyatlarning katta qismi tantanali xususiyatga ega.
Norvegiya Sog‘liqni saqlash vazirligi ma’lumotlariga ko‘ra, koronavirusga chalinish holatlari yanvarda keskin kamaya boshlagan, so‘nggi ikki haftadan buyon mamlakatda har kuni 250—300 kishi kasallanmoqda. Pandemiya boshidan buyon jami 1,5 million norvegiyalik virusga chalingan, shularning 3,6 mingi vafot etgan.
Izoh (0)