Estoniya hukumati sovet davriga tegishli barcha haykallarni “iloji boricha tezroq” jamoat joylaridan olib tashlashga qaror qildi, deb yozadi Meduza mamlakat bosh vaziri Kaya Kallasga tayanib.
“Asosiysi qaror qildik — sovet davri haykallari jamoat makonidan olib tashlanishi kerak, va biz buni iloji boricha tezroq qilamiz. Aniq vaqti va tartibi mahalliy hokimiyat organlari tayyorgarligiga va logistik rejasiga bog‘liq bo‘ladi, bu logistika xususiy sektordan ham xuddi shunday e’tibor, tashkilotchilik va ishtirokni talab etadi”, — dedi Kallas.
ERR yozishicha, Estoniyada jami 200 tadan 400 tagacha sovet davri haykallari bor.
Kallas Narva shahrida T-34 tanki ko‘rinishidagi yodgorlikni demontaj qilishni “alohida masala” deb atadi. Yodgorlikni olib tashlashga, xususan, Estoniya ichki ishlar vaziri Lauri Lyaenemets da’vat qilgandi. Ammo Narva meri Katri Rayk shahar hukumati buni qilmasligini aytdi. Shunga qaramay, 2-avgust kuni Narvada yodgorlik tez orada demontaj qilinishi haqida ma’lumot tarqaldi, bunga norozilik belgisi sifatida 100 dan ortiq mahalliy aholi namoyishga chiqdi.
“Bu tank Narva shahriga tegishli, va… Narvaning o‘zi demontaj qilmasligi va u yerda keskinlik paydo bo‘lishi tushunarli, shu sababli Estoniya davlati va hukumatining o‘zi ramziy qimmatlikka ega bo‘lgan shu va boshqa haykallarni ko‘chirish haqida qaror qabul qilishi kerak”, — dedi Kallas.
“Tank — bu o‘lim quroli, bu yodgorlik obyekti emas, Ukraina ko‘chalarida odamlar xuddi shu tanklar bilan o‘ldirilmoqda”, — deya qo‘shib qo‘ydi bosh vazir.
Iyul oxirida Kaya Kallas Estoniya hukumati Ikkinchi jahon urushi chog‘ida mamlakat hududida halok bo‘lgan sovet jangchilariga bag‘ishlangan barcha yodgorliklarni yo‘q qilishini aytgandi.
Izoh (0)