Эстония ҳукумати совет даврига тегишли барча ҳайкалларни «иложи борича тезроқ» жамоат жойларидан олиб ташлашга қарор қилди, деб ёзади Meduza мамлакат бош вазири Кая Калласга таяниб.
«Асосийси қарор қилдик — совет даври ҳайкаллари жамоат маконидан олиб ташланиши керак, ва биз буни иложи борича тезроқ қиламиз. Аниқ вақти ва тартиби маҳаллий ҳокимият органлари тайёргарлигига ва логистик режасига боғлиқ бўлади, бу логистика хусусий сектордан ҳам худди шундай эътибор, ташкилотчилик ва иштирокни талаб этади», — деди Каллас.
ERR ёзишича, Эстонияда жами 200 тадан 400 тагача совет даври ҳайкаллари бор.
Каллас Нарва шаҳрида Т-34 танки кўринишидаги ёдгорликни демонтаж қилишни «алоҳида масала» деб атади. Ёдгорликни олиб ташлашга, хусусан, Эстония ички ишлар вазири Лаури Ляэнеметс даъват қилганди. Аммо Нарва мэри Катри Райк шаҳар ҳукумати буни қилмаслигини айтди. Шунга қарамай, 2 август куни Нарвада ёдгорлик тез орада демонтаж қилиниши ҳақида маълумот тарқалди, бунга норозилик белгиси сифатида 100 дан ортиқ маҳаллий аҳоли намойишга чиқди.
«Бу танк Нарва шаҳрига тегишли, ва… Нарванинг ўзи демонтаж қилмаслиги ва у ерда кескинлик пайдо бўлиши тушунарли, шу сабабли Эстония давлати ва ҳукуматининг ўзи рамзий қимматликка эга бўлган шу ва бошқа ҳайкалларни кўчириш ҳақида қарор қабул қилиши керак», — деди Каллас.
«Танк — бу ўлим қуроли, бу ёдгорлик объекти эмас, Украина кўчаларида одамлар худди шу танклар билан ўлдирилмоқда», — дея қўшиб қўйди бош вазир.
Июль охирида Кая Каллас Эстония ҳукумати Иккинчи жаҳон уруши чоғида мамлакат ҳудудида ҳалок бўлган совет жангчиларига бағишланган барча ёдгорликларни йўқ қилишини айтганди.
Изоҳ (0)