Investitsiyalar va tashqi savdo vaziri Jamshid Xo‘jayev Turkiya savdo vaziri Mehmet Mush bilan uchrashdi, deb xabar qilmoqda Dunyo axborot agentligi.
Qayd etilishicha, uchrashuv davomida tomonlar o‘zaro savdoni faollashtirishga qaratilgan ikki tomonlama hamkorlikni rivojlantirish bo‘yicha fikr almashgan. Ta’kidlanishicha, so‘nggi besh yil ichida o‘zaro savdo hajmi ikki baravar o‘sgan va 2021-yilda 3,4 milliard dollarga yetgan. O‘zbekiston—Turkiya tovar ayirboshlash hajmini 2023-yilda 5 milliard dollarga, yaqin istiqbolda esa 10 milliard dollarga yetkazish maqsadida ushbu yo‘nalishdagi hamkorlikni davom ettirishga o‘zaro tayyorlik bildirilgan.
Tomonlar yaqin kelajakda Imtiyozli savdo to‘g‘risidagi bitimni ratifikatsiya qilish uchun uni kelishish jarayonini tezlashtirishga kelishib olgan. Shuningdek, savdo to‘siqlarini bartaraf etish, savdo operatsiyalarini amalga oshirishda bojxona tartib-qoidalarini soddalashtirish va ushbu sohada raqamli yechimlarni joriy etish bo‘yicha navbatdagi tadbirlar belgilangan.
Uchrashuv ishtirokchilari transport-logistika sohasidagi hamkorlikni chuqurlashtirish masalalariga alohida e’tibor qaratgan. Ikki mamlakat o‘rtasida avtomobil va havo transporti orqali yuk tashish ko‘rsatkichlarining ijobiy dinamikasini hisobga olgan holda, tomonlar transport infratuzilmasini rivojlantirish hamda ikki davlat o‘rtasida to‘g‘ridan-to‘g‘ri va tranzit yuk tashish hajmini oshirish bo‘yicha chora-tadbirlarni amalga oshirish muhimligi to‘g‘risida bir to‘xtamga kelgan
Uchrashuv yakunida tomonlar e’lon qilingan tashabbuslarni hayotga tatbiq etish bo‘yicha navbatdagi sa’y-harakatlarni hamda ko‘rib chiqilgan barcha yo‘nalishlar bo‘yicha o‘zaro hamkorlik qilish yo‘llarini belgilab olgan.
Izoh (0)