Milliy armiyaning kuch-qudrati va salohiyati, jangovar shayligi va kasbiy tayyorgarligini sinovdan o‘tkazadigan “ArMI-2022” xalqaro armiya o‘yinlari joriy yilning 13-avgustidan 27-avgustiga qadar dunyoning 12 ta davlati hududida o‘tkaziladi. Bu haqda AOKAda o‘tkazilgan brifingda Mudofaa vazirligi axborot xizmati rahbari Otabek Yo‘ldoshev ma’lum qildi.
Qayd etilishicha, O‘zbekiston Mudofaa vazirligi bu safar musobaqaning 20 ta yo‘nalishida ishtirok etadi. 34 ta yo‘nalishni qamrab olgan musobaqalarda 37 ta davlatdan 275 ta jamoa o‘zaro bellashadi.
Xususan, O‘zbekiston hududida ilk bor musobaqalarning 5 ta yo‘nalishi bo‘lib o‘tadi. Jizzaxdagi “Forish” poligonida “Dala oshxonasi” va “Qurolsoz usta” musobaqalari, Samarqanddagi “Sazagan” poligonida “Xavfsiz muhit”, Sharqiy harbiy okrugda “Yo‘l patruli” va Chirchiq oliy tank qo‘mondonlik-muhandislik bilim yurtida “Sodiq do‘st” musobaqasi o‘tkaziladi.
Shuningdek, O‘zbekiston Mudofaa vazirligi jamoalari Rossiya hududida o‘tkaziladigan “Elbrus halqasi”, “Avtozirxli tank-texnika ustasi”, “Qo‘shinlar razvedkasi a’lochisi”, “Tank biatloni”, “Harbiy-tibbiy estafeta”, “Harbiy ralli”, “Muhandis formulasi” musobaqalarida, Mo‘g‘ulistonda “Otliq marafon”, Belarusda “Ishonchli qabul” va “Qutb yulduzi”, Qozog‘istonda “Armiya taktik o‘qchisi” va “Meridian”, Venesuelada “Merganlik marrasi”, Jazoirda “Desant vzvodi” hamda Eronda “Professional mergan” yo‘nalishlarida ishtirok etadi.
Bundan oldin o‘zbekistonlik harbiylar Britaniyada o‘tkazilgan “Kembriya patruli” musobaqasida 2-o‘rinni egallagani, O‘zbekiston jamoasi “ArMI-2021” xalqaro armiya o‘yinlari yakuni bo‘yicha umumjamoa hisobida 2-o‘rinni egallagani to‘g‘risida xabar berilgandi.
Izoh (0)