Инвестициялар ва ташқи савдо вазири Жамшид Хўжаев Туркия савдо вазири Меҳмет Муш билан учрашди, деб хабар қилмоқда Дунё ахборот агентлиги.
Қайд этилишича, учрашув давомида томонлар ўзаро савдони фаоллаштиришга қаратилган икки томонлама ҳамкорликни ривожлантириш бўйича фикр алмашган. Таъкидланишича, сўнгги беш йил ичида ўзаро савдо ҳажми икки баравар ўсган ва 2021 йилда 3,4 миллиард долларга етган. Ўзбекистон—Туркия товар айирбошлаш ҳажмини 2023 йилда 5 миллиард долларга, яқин истиқболда эса 10 миллиард долларга етказиш мақсадида ушбу йўналишдаги ҳамкорликни давом эттиришга ўзаро тайёрлик билдирилган.
Томонлар яқин келажакда Имтиёзли савдо тўғрисидаги битимни ратификация қилиш учун уни келишиш жараёнини тезлаштиришга келишиб олган. Шунингдек, савдо тўсиқларини бартараф этиш, савдо операцияларини амалга оширишда божхона тартиб-қоидаларини соддалаштириш ва ушбу соҳада рақамли ечимларни жорий этиш бўйича навбатдаги тадбирлар белгиланган.
Учрашув иштирокчилари транспорт-логистика соҳасидаги ҳамкорликни чуқурлаштириш масалаларига алоҳида эътибор қаратган. Икки мамлакат ўртасида автомобиль ва ҳаво транспорти орқали юк ташиш кўрсаткичларининг ижобий динамикасини ҳисобга олган ҳолда, томонлар транспорт инфратузилмасини ривожлантириш ҳамда икки давлат ўртасида тўғридан-тўғри ва транзит юк ташиш ҳажмини ошириш бўйича чора-тадбирларни амалга ошириш муҳимлиги тўғрисида бир тўхтамга келган
Учрашув якунида томонлар эълон қилинган ташаббусларни ҳаётга татбиқ этиш бўйича навбатдаги саъй-ҳаракатларни ҳамда кўриб чиқилган барча йўналишлар бўйича ўзаро ҳамкорлик қилиш йўлларини белгилаб олган.
Изоҳ (0)