Ўзбекистон «АрМИ-2022» халқаро армия ўйинларида 5 та йўналишга мезбонлик қилади

Миллий армиянинг куч-қудрати ва салоҳияти, жанговар шайлиги ва касбий тайёргарлигини синовдан ўтказадиган «АрМИ-2022» халқаро армия ўйинлари жорий йилнинг 13 августидан 27 августига қадар дунёнинг 12 та давлати ҳудудида ўтказилади. Бу ҳақда АОКАда ўтказилган брифингда Мудофаа вазирлиги ахборот хизмати раҳбари Отабек Йўлдошев маълум қилди.

Қайд этилишича, Ўзбекистон Мудофаа вазирлиги бу сафар мусобақанинг 20 та йўналишида иштирок этади. 34 та йўналишни қамраб олган мусобақаларда 37 та давлатдан 275 та жамоа ўзаро беллашади.

Хусусан, Ўзбекистон ҳудудида илк бор мусобақаларнинг 5 та йўналиши бўлиб ўтади. Жиззахдаги «Фориш» полигонида «Дала ошхонаси» ва «Қуролсоз уста» мусобақалари, Самарқанддаги «Сазаган» полигонида «Хавфсиз муҳит», Шарқий ҳарбий округда «Йўл патрули» ва Чирчиқ олий танк қўмондонлик-муҳандислик билим юртида «Содиқ дўст» мусобақаси ўтказилади.

Шунингдек, Ўзбекистон Мудофаа вазирлиги жамоалари Россия ҳудудида ўтказиладиган «Элбрус ҳалқаси», «Автозирхли танк-техника устаси», «Қўшинлар разведкаси аълочиси», «Танк биатлони», «Ҳарбий-тиббий эстафета», «Ҳарбий ралли», «Муҳандис формуласи» мусобақаларида, Мўғулистонда «Отлиқ марафон», Беларусда «Ишончли қабул» ва «Қутб юлдузи», Қозоғистонда «Армия тактик ўқчиси» ва «Меридиан», Венесуэлада «Мерганлик марраси», Жазоирда «Десант взводи» ҳамда Эронда «Профессионал мерган» йўналишларида иштирок этади.