O‘zbekiston, Turkiya va Ozarbayjon ilk bor uch tomonlama muzokara o‘tkazadi. Bu haqda 1-avgust kuni prezident matbuot kotibi Sherzod Asadov ishtirokida bo‘lib o‘tgan brifingda ma’lum qilindi, deb xabar berdi “Daryo” muxbiri.
Sherzod Asadovning aytishicha, Toshkentda O‘zbekiston, Turkiya va Ozarbayjon tashqi ishlar, savdo hamda transport vazirlarining uch tomonlama uchrashuvi bo‘lib o‘tadi.
“Bu formatdagi uchrashuv ilk marotaba bo‘lmoqda. Muzokaralar kun tartibidan mintaqalararo hamkorlikni, investitsiya, innovatsiya va transport-kommunukatsiya sohalaridagi aloqalarni yanada rivojlantirish masalalari o‘rin olgan”, — deydi u.
Prezident matbuot kotibining aytishicha, Shavkat Mirziyoyev mazkur uchrashuvda ishtirok etish uchun O‘zbekistonga keladigan Turkiya tashqi ishlar vaziri Mexmet Chovushoglu hamda Ozarbayjon tashqi ishlar vaziri Jeyxun Bayramovni qabul qiladi.
“Shuningdek, davlatimiz rahbari 28-iyuldan beri mamlakatamizda bo‘lib turgan Yevropada xavfsizlik va hamkorlik tashkilotining Milliy ozchiliklar masalalari bo‘yicha komissari Qayrat Abdurahmanovni qabul qiladi”, — deydi Sherzod Asadov.
Bundan tashqari, hafta davomida O‘zbekiston iqtisodiy-ijtimoiy rivojlantirishga qaratilgan yig‘ilish va muhokamalar o‘tkazilishi rejalashtirilgan.
Izoh (0)