Ўзбекистон, Туркия ва Озарбайжон илк бор уч томонлама музокара ўтказади. Бу ҳақда 1 август куни президент матбуот котиби Шерзод Асадов иштирокида бўлиб ўтган брифингда маълум қилинди, деб хабар берди «Дарё» мухбири.
Шерзод Асадовнинг айтишича, Тошкентда Ўзбекистон, Туркия ва Озарбайжон ташқи ишлар, савдо ҳамда транспорт вазирларининг уч томонлама учрашуви бўлиб ўтади.
«Бу форматдаги учрашув илк маротаба бўлмоқда. Музокаралар кун тартибидан минтақалараро ҳамкорликни, инвестиция, инновация ва транспорт-коммунукация соҳаларидаги алоқаларни янада ривожлантириш масалалари ўрин олган», — дейди у.
Президент матбуот котибининг айтишича, Шавкат Мирзиёев мазкур учрашувда иштирок этиш учун Ўзбекистонга келадиган Туркия ташқи ишлар вазири Мехмет Човушоглу ҳамда Озарбайжон ташқи ишлар вазири Жейхун Байрамовни қабул қилади.
«Шунингдек, давлатимиз раҳбари 28 июлдан бери мамлакатамизда бўлиб турган Европада хавфсизлик ва ҳамкорлик ташкилотининг Миллий озчиликлар масалалари бўйича комиссари Қайрат Абдураҳмановни қабул қилади», — дейди Шерзод Асадов.
Бундан ташқари, ҳафта давомида Ўзбекистон иқтисодий-ижтимоий ривожлантиришга қаратилган йиғилиш ва муҳокамалар ўтказилиши режалаштирилган.
Изоҳ (0)