«Агробанк» масъуллари «Дарё»да эълон қилинган мақолага бир-бирига зид икки хил муносабат билдирди.
Нашрда Қарши шаҳрида яшовчи фуқаро Анвар Жавҳаров кредит олиш мақсадида банкка мурожаат қилгани, банк масъули у билан суҳбатда кредит олиш учун тириклигини исботловчи ҳужжат сўрагани хабар берилганди. Мазкур ҳолатга муносабат билдирган «Агробанк» ахборот хизмати дастлаб ҳолатни тасдиқлаб, банк масъули фуқаро Анвар Жавҳаров банкнинг кредит маълумотлар базасида вафот этган инсон сифатида қайд этилгани учун ундан шу ҳақда ҳужжат сўраганини ёзиб, қонунан банк ходимининг иши тўғрилигини таъкидлади.
Кўп ўтмай банк масъуллари дастлабки ахборотини таҳрирлаб, фуқародан бундай мазмундаги ҳужжат талаб қилинмаганини маълум қилди.
«Шуни ҳам алоҳида қайд этамизки, банк масъуллари томонидан фуқаро Анвар Жавҳаровдан унинг тириклигини тасдиқловчи маълумот сўралмаган, аксинча 2021 йилда шахс ҳақидаги электрон маълумотлар базасида унинг вафот этгани қайд этилгани учун тегишли ФҲДЁ бўлимидан буни инкор этувчи маълумот олиш мумкинлиги тушунтирилган», — дейилади «Агробанк»нинг ўзгартирилган муносабатида.
Шунингдек, банк масъул ходимлар ушбу фуқаро билан ўзаро суҳбат жараёнида унинг 2022 йил давомида кредит олиш бўйича банкка мурожаат қилмаганлиги аниқланганини қўшимча қилган.
Аввалига ахборот бериб, дастлабки ахборотини ўзи инкор қилган банк масъуллари Оммавий ахборот воситалари ходимларидан банкка тегишли маълумотларни тўлиқ ўрганмасдан, асосланмаган, текширилмаган материалларни тарқатмасликни сўраган.
«Бу ҳолатлар қонунчиликда кўрсатилган тегишли жавобгарликка олиб келиши мумкинлиги ҳақида яна бир бор огоҳлантирамиз», — дейилади банкнинг қайта таҳрирланган муносабатида.
«Дарё» таҳририяти жамоатчиликка банкнинг дастлабки ҳамда ўз ахборотини инкор қилган иккинчи муносабатини ҳам тақдим қилиб, масъулларга нотўғри ахборот тарқатганларга чора кўрилиши кераклигини эслатади.
Изоҳ (0)