Aktrisa Feruza Sobitova “Chotki TV” YouTube kanaliga bergan intervyusida dadasi bilan bog‘liq xotiralari, turmush o‘rtog‘i, nima sababdan ajrashgani, san’atni tark etishi, u uchun puldan ko‘ra rol muhim ekani, san’at olamida uni nima g‘azablantirayotgani haqida gapirdi.
Aktrisa dadasi bilan bog‘liq xotiralari, bir muddat arazlab gaplashmay yurgani va bundan afsuslanishi haqida
“Otam 2009-yilda olamdan o‘tdi. Erkak kishi ko‘p siqiladi, shunday paytda hamma dardlarini ichiga yutarkan, otam ham insult olmaganda hali yashar edi. Bu men uchun og‘ir zarba bo‘ldi. Otam oddiy inson bo‘lgan, velosiped haydab yurardi, Jo‘ra aka deyishardi. Ko‘zlari yashil va ko‘k rangda bo‘lgan, juda ko‘ngliochiq inson edi. Onamdan nima uchun mening ko‘zlarim otamnikiga o‘xshamagan deb so‘raganman. O‘qishga topshirishimdan oldin menga qizim, ketma, qol deb aytgan. Men esa ota, menga bir imkoniyat bering, topshiraman, kelaman, agar kirolmasam turmushga berasiz deganman. Otam boshida menga qattiqqo‘llik qilgan, ruhan ta’sir ko‘rsatdi. Men esa xafa bo‘lib gaplashmay yurdim, o‘qishdan qaytganimda pul ham, oziq-ovqat ham bermasdi. Onamga ham berma deb aytgan. U payti yosh bo‘lganman, otam meni yaxshi ko‘rmas ekan deb o‘ylaganman.
Hozir o‘ylayman, balki o‘sha payt qiynalsa qaytib keladi deb o‘ylagan bo‘lsa kerak. Qaytib kelishimni istagani uchun shu ishni qilgan, keyin men o‘sha paytda otam bilan gaplashmay qo‘yganman. Fe’l-atvorim juda yomon, xafa bo‘lsam gaplashmayman. Keyin otam kechirim so‘ragan. Ajrashayotgan vaqtimda ham iltimos, ajrashma degan. Men esa yo‘q, ota men yashay olmayman, bu mening hayotim, siz mening hayotimga aralashmang, turmush qurishimni istadingiz, mana turmush qurdim, u inson meni xohlamayotgan bo‘lsa qanday qilib yashayman, o‘zimni past pog‘onada his qilishni istamayman deganman”, — deydi aktrisa.
Turmush o‘rtog‘i va u bilan nima sababdan ajrashgani haqida
“Turmush o‘rtog‘im biznes sohasida faoliyat yuritgan, yaxshi inson edi. Ikkita begona inson turmush qurib oila bo‘ladi. Ikkita insonning qancha minus va qancha plus tomonlari, fe’l-atvori bor, bu tabiiy hol. Shuning uchun farzandlarimizni shunaqa tarbiya qilishimiz kerakki, qizlarimizga sabr, yigitlarimizga ham sabr, ayollarga bo‘lgan hurmat bo‘lishi kerak. Eng birinchi navbatda sevgidan ham ko‘ra, bir-birini tushunish, hurmat qilish, chunki erkaklarda yiqilishlar, pulsizlik holatlari bo‘ladi shunday holatda yaxshi oilada tarbiya qolgan ayol turmush o‘rtog‘ini qo‘llab-quvvatlaydi. Aytishadi-ku, har bir omadli erkakning ortida ayol kishi turadi deb.
Biz balki fe’l-atvor jihatdan bir-birimizga to‘g‘ri kelmagandirmiz. Ko‘p oilalarning buzilishiga ayol kishi sababchi bo‘ladi, ayol kishining yelkasiga ko‘p narsa yuklanadi, ona bo‘lish, uy bekasi bo‘lish katta vazifa aslida. Buning ustiga ayol kishi ishlashi ham kerak, bu juda qiyin. O‘sha paytda bir-birimizni tushunmadikmi yoki men uni tushunmadim, ko‘p narsalarga yordam ber talab qildim. Hozir bunga pushaymon qilishning foydasi yo‘q, taqdirni qabul qilib yashash kerak. Lekin ajrashishimga kasbim sababchi bo‘lgan deb bilaman”, — deydi Feruza Sobitova.
Firuza Sobitova san’atni tark etadimi?
“San’atdan sekin-sekin voz kechmoqchiman. Endi farzandim uchun yashamoqchiman. Kinoda sifat, professionallar qolmadi. Borayotganimda professionallar bormi, deb so‘rayman ha, deyishadi. Borganimda bir-ikkita professional insonlar bo‘ladi, qolgani notanish. Dorixonachi deysizmi, kosmetolog deysizimi kinoda siz bilan birga rol o‘ynab yuribdi. Daraja tushib ketdi, sifatsiz narsalarda hattoki pul uchun ham o‘ynagim kelmayapti. Undan ko‘ra boshqa joyda ishlab pul topaman”, — deydi aktrisa.
Aktrisa u uchun puldan ko‘ra rolning qanaqa ekani muhimligi haqida
“Rol muhimroq. Bizga uncha ko‘p pul to‘lanishi qiyin masala. Hozir kinoda qanchaga rol o‘ynashimni aytsam ko‘pchilikka to‘gri kelmayapti. Endi sifat bo‘ladi, yaxshi komanda bo‘ladi, haqiqatan ham meni o‘sha rolni o‘ynashimni istasa aytilgan pulni to‘laydi. Bo‘lmasa meni ham zorlanib turgan joyim yo‘q”, — deydi Feruza Sobitova.
Firuza Sobitovani san’atdagi qaysi holat g‘azablantirmoqda?
“San’atdagi ‘konfetlar’ menga yoqmayapti. San’atdan ketganim bilan jonim achiydi, sifat bo‘lishi kerak. ‘Konfetlar’ga aytadigan gapim shu: joyida to‘xtab o‘zini bor narsalarni qadrlab yashasin. Ularning kinoga intilayotganini sababi mashhurlik yetmayapti. Kimdir meni ko‘rsin, televizorda chiqayapman, degan gap-so‘zlar kerakligi uchun qilinmoqda. Aslida mashhur bo‘lmasdan turib ham, artist bo‘lmasa ham mazza qilib yashasa bo‘ladi. Inson o‘zining ustida ishlashi kerak, inson o‘zini, oilasini, turmush o‘rtog‘ini boricha qabul qilib yashasa ham hayot go‘zal bo‘ladi, lekin ular buni mashhurlikda deb o‘ylaydi”, — deydi Feruza Sobitova.
Mavzuga doir:
Izoh (0)