Shou-biznes vakillarini go‘zal tashqi ko‘rinishda ko‘rishga o‘rganib qolganmiz. Ular soch turmagi, pardozi va liboslari bilan boshqalardan ajralib turishi kerak. “Daryo” muxbiri Nargizaxon Murodova san’atkorlar bilan doimiy hamkorlik qiladigan mashhur to‘rt stilist bilan suhbatda bo‘ldi. Afsuski, ularning hammasi ham xizmat haqqini ommaga oshkor etishni istamadi.
Iroda Rustamova: “San’atkorlar bilan san-manga bormaganman”
Instagram’da Irosha nomi bilan mashhur stilist hisoblanadi. U 1987-yili tavallud topgan bo‘lib, Moskvadagi Goar Avitsian, Sochidagi Georgiy Kot, Bakuda Gunay Jabrailova va Afaq xonum maktablarida tahsil olgan.
— San’atkorlardan ilk mijozim Ra’no Yarasheva bo‘lgan. Juda hayajonlanganman. Shukrki, bugungi kunda doimiy mijozlarim orasida shou-biznes vakillari juda ko‘p. Ularning imijini yaratayotganda, ko‘proq ularning istaklariga quloq tutaman. Chunki san’atkor mijozlarimning deyarli barchasi oilali va imij tashlashda turmush o‘rtoqlariga quloq solishadi. Keyin klip, konsert va to‘y-xizmatlari uchun qilingan imijlar bir-biridan farq qiladi.
Azamat Zayniddinov: “Imijni 150 ming so‘mga baholaydigan mashhurlar ham bor”
O‘zbekistondagi eng mashhur stilistlardan biri hisoblanadi. U Xitoy xalq respublikasidagi “Asian beauty academy”da tahsil olgan. Uning ilk mijozi xonanda va ayni kunda mashhur tadbirkor Nora Zayniddinova bo‘lgan.
— Birxillikni yoqtirmayman. Har bir mijozimga kreativ yondashishga, o‘ziga xos imij yaratishga harakat qilaman. Mijozlarim orasida shou-biznes vakillari juda ko‘p. Masalan, Ozoda Nursaidova, Feruza Jumaniyozova, Sevinch Mo‘minova, Zarina Nizomiddinova va boshqalar.
O‘z ishimni sevishimni va shunga yarasha haq talab qilishimni bilishadi. Ammo shou-biznes vakillari orasida yaratilgan imij uchun 150 ming so‘m pulni tashlab ketadiganlar ham yo‘q emas. Yoki “Sizni Instagram’da reklama qilib qo‘yaman”, deb narxni tushirishga ham urinadiganlar bor. Gap faqat reklamada emas, stilistning ham o‘ziga yarasha xarajatlari bor. Afsuski, buni tushunishmayotgani alam qiladi. Mehnatimni qadrlaydigan san’atkor — Feruza Jumaniyozova, — deydi mahoratli stilist Azamat Zayniddinov.
Azamat Zayniddinov O‘zbekistondagi eng qimmat stilistlardan biri. U oqshom obrazini 2 000 000 so‘m haq evaziga yaratadi.
Shohruh Musayev: “Ilk mijozim Asal Shodiyeva bo‘lgan”
Instagram’da Shaxa nomi bilan mashhur bo‘lgan stilist hisoblanadi. U 1992-yil Toshkent shahrida tug‘ilgan. Birinchi mutaxassisligi bo‘yicha mebel jihozlash dizayneri hisoblanadi. So‘ng Bekzod Saidovga shogirdlikka tushib, stilistlik sohasini o‘rgangan.
— Georgiy Kot va Tatyana Beloyning xalqaro go‘zallik maktablarida tahsil olganman. San’atkorlardan ilk mijozim aktrisa Asal Shodiyeva bo‘lgan. U bilan haligacha birga ishlaymiz. San’atkorlarning imijini yaratishda boshqalarga o‘xshab qolmasligiga ahamiyat beraman. Ular bilan tortishmaslikka harakat qilaman. Ammo baribir ikki ijodkor o‘rtasida tortishuvlar bo‘lib turadi.
Doimiy mijozlarim Halimaxonim, Asal Shodiyeva, Nilufar Sotvoldiyeva, Shoira Otabekova, Nigora Karimboyevalar hisoblanishadi.
Leyla Xo‘ja: “Rayhonga sodiqman, boshqa san’atkorlar bilan ishlamayman”
Bu stilist xonanda Rayhon G‘aniyevaga hamisha sodiq. Shu kungacha Rayhondan boshqa birorta san’atkor bilan ijodiy hamkorlik qilmagan. Buning sababini Leyla quyidagicha izohlaydi.
— Ilk marta Rayhon G‘aniyevaning tashqi ko‘rinishi ustida ishlaganimda ancha yosh edim. U bilan tezda til topishib ketganmiz. Nega boshqa xonandalar bilan ishlamasligimga ko‘pchilik qiziqadi. Nazarimda, san’atkor uchun boshqalarga o‘xshamaydigan obraz yaratish kerak. Stilistning san’atkor mijozlari ko‘p bo‘lsa, ular bir-biriga o‘xshash bo‘lib qolishi mumkin.
Klipga imij yaratish uchun Rayhon ikkimiz uzoq vaqt bosh qotiramiz. Avval uni eshitaman, keyin fikrlarimni aytaman. Klip tarixda qoladi, 5-6 yildan keyin uni ko‘rganda odamlar ko‘ziga imij g‘alati, beo‘xshov ko‘rinmasligi kerak. Odamda klip imijlari uchun trenddagi uslublardan foydalanmayman. Chunki ular juda tez eskiradi va undan bir vaqtning o‘zida ko‘pchilik foydalanadi.
Ko‘pchilik xonandalar hamkorlik qilishni taklif qilishgan. Ularga to‘g‘ri tushuntirgan holda rad javobini beraman. Ammo shou-biznesga aloqador bo‘lmagan qiz-ayollarning imiji ustida ishlashga hamisha tayyorman. Rayhon bilan moliyaviy masalada tortishmaymiz. U hamisha rozi qiladi. Qizlarning imijini esa 500 000-1 500 000 gacha narxda yaratib beraman, — deydi Leyla Xo‘ja.
Mavzuga doir:
- Go‘zallik ma’budasi: Monika Belluchchining tarixga kirgan 15 ta eng yorqin obrazi (foto)
- Rassom vaqtning juda tez o‘tayotganini ko‘rsatish uchun mashhurlarning hozirgi suratini yoshligidagi ko‘rinishi bilan yonma-yon aks ettirdi (foto)
- Hayratda qolishingiz kafolatlangan: butunlay boshqa qiyofaga kirgan grimdagi yulduzlar (foto)
Izoh (0)