Актриса Феруза Собитова «Chotki TV» YouTube каналига берган интервьюсида дадаси билан боғлиқ хотиралари, турмуш ўртоғи, нима сабабдан ажрашгани, санъатни тарк этиши, у учун пулдан кўра рол муҳим экани, санъат оламида уни нима ғазаблантираётгани ҳақида гапирди.
Актриса дадаси билан боғлиқ хотиралари, бир муддат аразлаб гаплашмай юргани ва бундан афсусланиши ҳақида
«Отам 2009 йилда оламдан ўтди. Эркак киши кўп сиқилади, шундай пайтда ҳамма дардларини ичига ютаркан, отам ҳам инсульт олмаганда ҳали яшар эди. Бу мен учун оғир зарба бўлди. Отам оддий инсон бўлган, велосипед ҳайдаб юрарди, Жўра ака дейишарди. Кўзлари яшил ва кўк рангда бўлган, жуда кўнглиочиқ инсон эди. Онамдан нима учун менинг кўзларим отамникига ўхшамаган деб сўраганман. Ўқишга топширишимдан олдин менга қизим, кетма, қол деб айтган. Мен эса ота, менга бир имконият беринг, топшираман, келаман, агар киролмасам турмушга берасиз деганман. Отам бошида менга қаттиққўллик қилган, руҳан таъсир кўрсатди. Мен эса хафа бўлиб гаплашмай юрдим, ўқишдан қайтганимда пул ҳам, озиқ-овқат ҳам бермасди. Онамга ҳам берма деб айтган. У пайти ёш бўлганман, отам мени яхши кўрмас экан деб ўйлаганман.
Ҳозир ўйлайман, балки ўша пайт қийналса қайтиб келади деб ўйлаган бўлса керак. Қайтиб келишимни истагани учун шу ишни қилган, кейин мен ўша пайтда отам билан гаплашмай қўйганман. Феъл-атворим жуда ёмон, хафа бўлсам гаплашмайман. Кейин отам кечирим сўраган. Ажрашаётган вақтимда ҳам илтимос, ажрашма деган. Мен эса йўқ, ота мен яшай олмайман, бу менинг ҳаётим, сиз менинг ҳаётимга аралашманг, турмуш қуришимни истадингиз, мана турмуш қурдим, у инсон мени хоҳламаётган бўлса қандай қилиб яшайман, ўзимни паст поғонада ҳис қилишни истамайман деганман», — дейди актриса.
Турмуш ўртоғи ва у билан нима сабабдан ажрашгани ҳақида
«Турмуш ўртоғим бизнес соҳасида фаолият юритган, яхши инсон эди. Иккита бегона инсон турмуш қуриб оила бўлади. Иккита инсоннинг қанча минус ва қанча плус томонлари, феъл-атвори бор, бу табиий ҳол. Шунинг учун фарзандларимизни шунақа тарбия қилишимиз керакки, қизларимизга сабр, йигитларимизга ҳам сабр, аёлларга бўлган ҳурмат бўлиши керак. Энг биринчи навбатда севгидан ҳам кўра, бир-бирини тушуниш, ҳурмат қилиш, чунки эркакларда йиқилишлар, пулсизлик ҳолатлари бўлади шундай ҳолатда яхши оилада тарбия қолган аёл турмуш ўртоғини қўллаб-қувватлайди. Айтишади-ку, ҳар бир омадли эркакнинг ортида аёл киши туради деб.
Биз балки феъл-атвор жиҳатдан бир-биримизга тўғри келмагандирмиз. Кўп оилаларнинг бузилишига аёл киши сабабчи бўлади, аёл кишининг елкасига кўп нарса юкланади, она бўлиш, уй бекаси бўлиш катта вазифа аслида. Бунинг устига аёл киши ишлаши ҳам керак, бу жуда қийин. Ўша пайтда бир-биримизни тушунмадикми ёки мен уни тушунмадим, кўп нарсаларга ёрдам бер талаб қилдим. Ҳозир бунга пушаймон қилишнинг фойдаси йўқ, тақдирни қабул қилиб яшаш керак. Лекин ажрашишимга касбим сабабчи бўлган деб биламан», — дейди Феруза Собитова.
Фируза Собитова санъатни тарк этадими?
«Санъатдан секин-секин воз кечмоқчиман. Энди фарзандим учун яшамоқчиман. Кинода сифат, профессионаллар қолмади. Бораётганимда профессионаллар борми, деб сўрайман ҳа, дейишади. Борганимда бир-иккита профессионал инсонлар бўлади, қолгани нотаниш. Дорихоначи дейсизми, косметолог дейсизими кинода сиз билан бирга рол ўйнаб юрибди. Даража тушиб кетди, сифатсиз нарсаларда ҳаттоки пул учун ҳам ўйнагим келмаяпти. Ундан кўра бошқа жойда ишлаб пул топаман», — дейди актриса.
Актриса у учун пулдан кўра ролнинг қанақа экани муҳимлиги ҳақида
«Рол муҳимроқ. Бизга унча кўп пул тўланиши қийин масала. Ҳозир кинода қанчага рол ўйнашимни айтсам кўпчиликка тўгри келмаяпти. Энди сифат бўлади, яхши команда бўлади, ҳақиқатан ҳам мени ўша ролни ўйнашимни истаса айтилган пулни тўлайди. Бўлмаса мени ҳам зорланиб турган жойим йўқ», — дейди Феруза Собитова.
Фируза Собитовани санъатдаги қайси ҳолат ғазаблантирмоқда?
«Санъатдаги ‘конфетлар’ менга ёқмаяпти. Санъатдан кетганим билан жоним ачийди, сифат бўлиши керак. ‘Конфетлар’га айтадиган гапим шу: жойида тўхтаб ўзида бор нарсаларни қадрлаб яшасин. Уларнинг кинога интилаётганининг сабаби машҳурлик етмаяпти. Кимдир мени кўрсин, телевизорда чиқяпман, деган гап-сўзлар кераклиги учун қилинмоқда. Аслида машҳур бўлмасдан туриб ҳам, артист бўлмаса ҳам, мазза қилиб яшаса бўлади. Инсон ўзининг устида ишлаши керак, инсон ўзини, оиласини, турмуш ўртоғини борича қабул қилиб яшаса ҳам ҳаёт гўзал бўлади, лекин улар буни машҳурликда деб ўйлайди», — дейди Феруза Собитова.
Мавзуга доир:
Изоҳ (0)