Shou-biznes vakillari orasida o‘zbek millatiga mansub bo‘lsa-da, bu tilda gapirishni istamaydigan ijodkorlar juda ko‘p. Albatta, ularni oqlab bo‘lmaydi. Chunki tilni bilmay qo‘shiq kuylash talaffuzning noto‘g‘ri qo‘llanishiga va ma’nosiz qo‘shiqlarning yaratilishiga ham sabab bo‘ladi. Ammo ijodkorlar orasida o‘zga millat vakili bo‘lsa-da, sof o‘zbek tilida gapirishga intiladiganlar juda ko‘p. Ular nima uchun o‘zbek tilini o‘rganishga ahd qilishgani haqida quyida so‘zlab beradi.
Milena Madmusayeva: “Maktabga chiqqunga qadar o‘zbekchani bilmaganman”
— Onam eron, otam esa tojik millatiga mansub. Uyimizda asosan forsiy tilda gaplashiladi. Ota-onam jamiyatga moslashib ketishda qiynalmasligim uchun meni rus bog‘chaga bergan. Shundan keyin biroz rus tilini o‘rganganman. Ota-onam “O‘zbekistonda yashayapmizmi, demak Milena shu tilni bilishi kerak”, deb o‘zbek maktabiga o‘qishga bergan. Avvaliga bu tilni o‘rganishga qiynalganman, ammo vaqt o‘tib hammasi iziga tushib ketgan, — deydi Milena Madmusayeva.
Nigina Anorboyeva: “Qo‘shni bolalar sabab turli tillarni o‘rgandim”
— Oilamiz aralash millatdan tashkil topgan. Dadam o‘zbek, onam esa qozoq millatiga mansub. Mahallamizda turli millat vakillari istiqomat qilishardi. Qo‘shni bolalar sabab turli millat tillaridan oz-ozdan o‘rganganman, — deydi aktrisa Nigina Anorboyeva.
Kamila Gimandinova: “Onam ukrainalik, otam esa rus”
— Otam rus, onam esa ukrain millatiga mansub bo‘lgan. Ammo onam bir yoshimda meni otamga tashlab o‘zi ketib qolgan. Uni faqat birgina rasmi orqali ko‘rganman. O‘zbek tilida deyarli bilmasdim. “Qadam” serialidan keyin bu tilni yanada yaxshiroq bilishim kerakligini angladim. Ba’zi so‘zlarning haligacha tushunmayman, ammo o‘rganishga va bu tilda xatosiz gapirishga harakat qilaman, — deydi aktrisa va bloger Kamila Gimandinova.
Anjela Yesimbetova: “Men o‘zbek bo‘lib tug‘ilishim kerak edi”
— Qoraqalpoq oilasida dunyoga kelganman. O‘n birinchi sinfga qadar qoraqalpoq maktabida o‘qiganman. Maktabimizda faqat haftada bir soat o‘zbek tili va rus tili darslari bo‘lardi. O‘qituvchilarning kamligi yoki boshqa sabablar bilan o‘zbek tili darslari har doim ham bo‘lavermasdi. Ammo men o‘zbek tilidagi kitoblarni ko‘p o‘qirdim. “O‘zi men o‘zbek bo‘lib tug‘ilishim kerak edi”, derdim. Toshkentga kelgan paytimda bu tilda gaplashishga biroz qiynalganman, ammo vaqt o‘tgan sari o‘z ona tilimdek bo‘lib ketgan, — deydi aktrisa va rejissor Anjela Yesimbetova.
Tatyana Sharq: “O‘zbek tili ijodimga ham hayotimga faqat ijobiy ta’sir etgan”
— Rus oilasida tug‘ilganman. Institutda o‘qib yurgan paytimda ham deyarli o‘zbek tilini bilmaganman. Toshkent irrigatsiya va qishloq xo‘jaligini mexanizatsiyalash muhandislari institutida o‘qiyotgan vaqtim juda ko‘p konsertlarda ishtirok etardim. O‘shanda menga o‘zbek tilini o‘rganishga xohish tug‘ilgan. O‘zbek tilidagi qo‘shiqlarni ijro etishdan avval so‘zlarni yodlardim va ma’nosini bilishga harakat qilardim. Bu tilni o‘rganishim ijodimga ham hayotimga faqat ijobiy ta’sir etgan, — deydi “Sharq” guruhi xonandasi Tatyana Zayseva.
Osman Navro‘zov: “Ona tilim emas, o‘zbek tili muvaffaqiyat keltirdi”
— Asli millatim turkman, ammo qoraqalpoq elida tavallud topganman. Turkman maktabida o‘qiganim uchun qoraqalpoq tilini u qadar yaxshi bilmayman. Ya’ni tushunaman, ammo gapirishga qiynalaman. Ammo o‘zbek tili ancha yaxshi bilaman. Bunga sabab turkman tilida kuylagan qo‘shiqlarim unchalik muvaffaqiyatli chiqmagan. O‘zbek tilidagi “Lyubimaya” qo‘shig‘i xonanda bo‘lib tanilishimga ulkan hissa qo‘shgan. Shu bois, o‘zbek tilin yanada yaxshi o‘rganimga harakat qilaman, — deydi xonanda Osman Navro‘zov.
Zuhra Soliyeva: “Millatim — eroniy”
— Millatim o‘zbek emas, eroniy. Bobom ancha yillar avval Samarqandga ko‘chib kelgan, ammo farzandlari shu diyorda dunyoga kelgan. Oilamizning barcha vakillari o‘zbek va tojik tillarini yaxshi bilishadi, — deydi aktrisa Zuhra Soliyeva.
Arevat Grigoryan: “Til o‘rganish uchun o‘sha millatni sevish kerak”
— Otam arman millatiga mansub va onam rus. 11 yoshimda otam vafot etgach, onam men va ikki akamni yolg‘iz ulg‘aytirgan. Men aynan Toshkentda tug‘ilganim uchun o‘zbek xalqini judayam yaxshi ko‘raman. Ota-onam ham shu yurt vakillarini yaxshi ko‘rishgani sababli oilaviy muhitimiz ham o‘zbekona bo‘lgan. Shuning uchun meni o‘zbek bog‘chasiga yuborishgan. Shundan so‘ng o‘zbek maktabida ta‘lim oldim. Shu millatga sevgim va muhabbatim tufayli o‘zbek tilini yaxshi bilsam kerak. Mening fikrimcha odam o‘zga tilni mukammal o‘rganishi uchun, o‘sha millatni sevishi kerak, — deydi suxandon Arevat Grigoryan.
Mavzuga doir:
- Yulduz Usmonova, Shahzoda, Ulug‘bek Rahmatullayev va chet el xonandalari bilan duet kuylagan boshqa o‘zbek san’atkorlari (video)
- Sovitkich, mashina va uy. O‘zbek shou-biznesi vakillarining ilk daromadidan qilgan qimmatbaho xaridlari (video)
- 500 kvadrat metrli garderob, isitish tizimiga ega garaj, mini hayvonot bog‘i: O‘zbekistonlik san’atkorlar qanday uylarda yashaydi? (foto, video)
Izoh (0)