Muhtoj ayollarni uy-joy bilan ta’minlash ishlari 10 foiz ham bajarilmagan. Bu haqda 27-iyul kuni bo‘lib o‘tgan Xotin-qizlarning jamiyatdagi rolini oshirish, gender tenglik va oila masalalari bo‘yicha Respublika komissiyasining majlisida Oliy majlis senati raisi Tanzila Norboyeva aytib o‘tdi, deya xabar bermoqda “Daryo” muxbiri.
Majlisda Senat raisi Tanzila Norboyeva ma’lum qilishicha, 2022—2023-yillar davomida “ayollar daftari” tizimi orqali 12 ming nafar xotin-qizlarni ijtimoiy ijara shartlari asosida ijtimoiy uy-joylarga joylashtirish nazarda tutilgan.
“Birinchi yarim yillik davomida bor-yo‘g‘i 581 nafari uy-joy bilan ta’minlangan. Agar joriy yilda 6 ming nafar qizlarni ijtimoiy uy-joylarga joylashtirish orqali uy-joy muammosini hal etish rejalashtirilgan bo‘lsa, bu reja hali 10 foizga ham bajarilmagan. Bu ishlar alohida tartib asosida tashkil etilmaydigan bo‘lsa, turli xil ijtimoiy muammolarni, xotin-qizlar orasida norozichiliklarni keltirib chiqarishi mumkin. Prezident qarorni qabul qilib, parametrlarni belgilab berganidan keyin, hozir aholimiz savodli, o‘qib, mana, biz ham shu toifaga kiramiz, deb turibdi. Lekin 10 foiz bo‘lsa xotin-qizlarda ishonch qoladimi? Shu hujjatlarga, shu qarorlarga, umuman davlat siyosatiga ishonch qoladimi?”, — dedi Norboyeva xonim.
Senat raisining alohida ta’kidlashicha, “ayollar daftari”ga kiritilgan 430 ming nafar xotin-qizlarga ularning ta’mirtalab uy-joylarini ta’mirlash uchun qurilish materiallarini olib berish va ta’mirlash ishlarini amalga oshirish bo‘yicha topshiriq ham deyarli bajarilmagan.
“Joriy yilda 15 ming nafar xotin-qizga uy-joyni ta’mirlashga ko‘maklashish rejalashtirilgan bo‘lsa, shu kunga qadar reja amalda 1 foizdan ko‘proqqa bajarilgan, xolos. Yarim yil o‘tdi, nimani o‘ylayapsizlar? Kim buni nazorat qilyapti? Nima tadbirbozliklar qilib yuribsizlar pastda? Tadbirbozlik qilmanglar, mana shunday aniq ishlar bilan shug‘ullaninglar”, — dedi yuqori palata rahbari.
Senat tomonidan tanqid qilingan vaziyatlar ijrosiga mas’ul bo‘lgan idora sifatida Oila va xotin-qizlar davlat qo‘mitasi raisi Zulayho Mahkamova javob berib o‘tdi.
“‘Ayollar daftari” bo‘yicha bildirilgan e’tirozlar Kasaba uyushmalari federatsiyasida xuddi shu masala bo‘yicha sektor rahbarlari bilan birga hamkorlikda muhokamalar qilinganidan so‘ng, hozir har bittasini kunma-kun olyapmiz. Aynan ta’mirga muhtoj ishlarimiz orqada edi. Hozir bu bo‘yicha ham anchagina muammolar bor edi. Orttirilgan budjet qismidan mablag‘lar ham joyiga qo‘yildi. MIBdan tushadigan mablag‘lar ayrim joylarda o‘z vaqtida tushmaganligi sababli kechikdi. Bularning hammasini joy-joyiga qo‘yib, hokimlar, qo‘shimcha sektorlar imtiyoz va imkoniyatlar berib, bu masalaga ham oydinlik kiritildi”, — dedi Zulayho Mahkamova.
Izoh (0)